Yevropa komissiyasi “VKontakte” ijtimoiy tarmog‘i va Telegram messenjerini “Kontrafakt va qaroqchilik mahsulotlarini kuzatish ro‘yxati”ga qo‘shib qo‘ydi. 14-dekabr sanasi bilan imzolangan hujjat Yevrokomissiyaning saytida e’lon qilingan, deb xabar beradi Meduza.
“VKontakte” va Telegram musiqa, kitoblar, filmlar va mualliflik huquqi bilan himoyalangan boshqa kontentlarni muallifning ruxsatisiz foydalanish imkonini beradigan onlayn-resurslar ro‘yxatiga kiritilgan.
Platformalar foydalanuvchilari tomonidan tarqatilayotgan kontentlarga nisbatan tushgan shikoyatlar sabab ro‘yxatdan o‘rin olgan. Mualliflik huquqiga ega insonlarning ta’kidlashicha, “VKontakte” katta miqdordagi qaroqchilik kontenti bilan ajralib turadi, Telegram esa e’tirozlarga doim ham e’tibor qaratmaydi.
Hujjatda ta’kidlanishicha, “VKontakte” va Telegram o‘zlarining ushbu ro‘yxatga kiritilishlariga e’tiroz bildirgan. Ikkala platforma ham qaroqchilik kontentiga qarshi kurashayotganliklarini ma’lum qilgan, xususan, 24 soat ichida barcha shikoyatlarni o‘chirishga urinishmoqda.
“Kontrafakt va qaroqchilik mahsulotlarini kuzatish ro‘yxati”ga 2018-yilda asos solingan. Unga qaroqchilik kontentidan foydalanish imkonini beradigan onlayn-resurslar, kontrafakt dori vositalarini tarqatishga, sotishga bog‘liq servislar va onlayn-do‘konlar kiritilgan.
Ro‘yxatning yangilangan versiyasidan Telegram va “VKontakte”dan tashqari Rossiyaning Seasonvar va Rutracker onlayn-platformalari, shuningdek, Moskvadagi “Gorbushkin dvor” savdo markazi ham kiritilgan.
Eslatib o‘tamiz, 2015-yilda AQSh Savdo vakolatxonasi USTR Rossiyaning “VKontakte” ijtimoiy tarmog‘ini, “Rutracker.org” torrent-trekerini, “Rapidgator.net” va “4shared.com” fayl almashuv xizmatlarini dunyodagi eng yirik “qaroqchi” resurslar ro‘yxatidan chiqarishdan bosh tortgandi.
Izoh (0)