AQSh prezidenti etib saylangan Jo Bayden Pit Buttijni o‘z administratsiyasiga transport vaziri etib tayinlashni taklif qildi, deb xabar bermoqda Meduza CNN’ga tayanib.
Buttij AQSh Demokratik partiyasi kampaniyasida Baydenning raqibi bo‘lgan. Mart oyida u saylovlar poygasidan chiqib, Baydenning AQSh prezidentligiga nomzodini rasman qo‘llab-quvvatlagan.
CNN’ning qayd etilishicha, saylangan prezident o‘z administratsiyasiga sobiq raqibini lavozimga tayinlashi AQSh tarixida birinchi marta kuzatilmoqda. Agar uning taklifi Senat tomonidan ma’qullansa, Buttij vazir lavozimini egallagan tarixda birinchi ochiq besoqolboz bo‘ladi.
Pit Buttij 2020-yilgi prezidentlik kampaniyasida ishtirok etishidan oldin 8 yil davomida Indiana shtatining Saut-Bend shahri meri bo‘lgan.
Eslatib o‘tamiz, 15-dekabr kuni saylovchilar hay’ati Jo Baydenning AQSh prezidenti etib saylanganini tasdiqladi. Bayden uchun saylovchilarning 306 ta, Donald Tramp uchun 232 ta ovozi berilgan. G‘alaba uchun esa 270 ta ovoz to‘plash kerak edi. 23-dekabrgacha saylovchilar hay’ati ovozlaridan iborat byulletenlar Vashingtonga yetkaziladi. 2021-yil 6-yanvar kuni ovozlar AQSh Kongressi Vakillar palatasi va Senatning qo‘shma majlisida hisoblab chiqiladi. 20-yanvar kuni saylangan prezidentning inauguratsiyasi bo‘lib o‘tadi.
Tojikiston prezidenti Emomali Rahmon, Rossiya prezidenti Vladimir Putin Jo Baydenning AQSh prezidenti etib saylangani bilan tabriklagan.
Izoh (0)