eBay auksioni orqali 1954-yilda ishlab chiqarilgan o‘quv mashg‘ulotlari uchun mo‘ljallangan Plymouth Belvedere sotuvga qo‘yildi. Ikkita rul va qo‘shimcha tepkilar bilan jihozlangan avtomobilni 13 ming dollar evaziga xarid qilish mumkin, deb xabar beradi Motor.
Sotuvga qo‘yilgan Plymouth Belvedere boy tarixga ega. Amerikaning mashhur sedaniga ikkita rul chambaragi va qo‘shimcha tepkilar o‘rnatilgan bo‘lib, undan o‘tgan asrning o‘rtalarida o‘quv mashinasi sifatida foydalanilgan. Avtomaktabning qancha o‘quvchisi ushbu avtomobilni haydab ko‘rgani noma’lum, biroq u hozirga qadar 18 ming kilometr yo‘l bosgan.
Yoshiga qaraganda Belvedere yaxshi ahvolda saqlangan. Kapotining ayrim zonalari hisobga olinmaganda avtomobil kuzovida zanglash o‘choqlari yo‘q, oq charm bilan qoplangan saloni esa yangidek. Bundan tashqari, eshikning ichki qismida XX asrga tegishli ko‘plab “nakleyka”lar saqlanib qolgan.
Plymouth Belvedere kapoti ostidan 110 ot kuchiga ega 3,7 litrli V6 benzin dvigateli o‘rin olgan. Agregat mexanik uzatmalar qutisi yordamida boshqariladi. Sotuvchining so‘zlariga ko‘ra, avtomobilning barcha agregatlari soz holatda. Faqatgina 56 yillik Plymouth’ning tormoz tizimini tekshirish kerak xolos.
Avvalroq AQSh maxsus xizmatiga tegishli bo‘lgan Plymouth auksionga qo‘yilgani to‘g‘risida xabar berilgandi.
Izoh (0)