AOKA huzurida Jamiyatda korrupsiyaga qarshi kurashish haqida matbuot anjumani bo‘lib o‘tdi. Unda O‘zbekiston Ichki ishlar vazirligi vakillari ishtirok etdi.
Anjumanda qatnashgan jurnalist tomonidan avtomobil old oynalarini “tonirovka” qilish yo‘l-transport hodisalari ko‘payishiga sabab bo‘layotgani va aynan old oynalarni qoraytirishni taqiqlash borasida taklif berdi.
Ichki ishlar vazirligi vakili bunga quyidagicha javob berdi:
“Avtomobil old oynalari faqat 50 foiz yorug‘lik o‘tkazuvchanligi bo‘yicha tusini o‘zgartirish ruxsat berilgan. Avtomobillar oynalari qoraytirilgani yo‘l-transport hodisasi sodir etilishiga sabab bo‘lmaydi. O‘zbekistonda aynan “tonirovka” tufayli yuz bergan YTH ro‘yxatga olinmagan”.
Bunga huquqshunos Xushnudbek Xudoyberdiyev Telegram kanalida quyidagicha munosabat bildirib o‘tdi.
“Agar ‘tonirovka’ yo‘l harakati uchun hech qanday xavf tug‘dirmasa, unda nega uni o‘rnatish pullik? Nega jarimalari rekord darajada qimmat?
Mayli, ruxsatnoma uchun qandaydir ramziy to‘lov bo‘lsin ham deylik, lekin bu to‘lov nima uchun old va orqa yon oynalarga 11 million 150 ming so‘m, orqa yon oynaning o‘ziga 1 million 115 ming so‘m etib belgilangan? Va bu to‘lov bir yil uchun xolos.
Bu narx nimaga asosan belgilangan? Va bu narx adolatli deb ayta olamizmi? Masalan, orqa yon oynaga ‘tonirovka’ qilishni tekin yoki aytaylik, 20—30 ming so‘m qilib qo‘ysak, jamiyatga biror zarar yetadimi?
Orqa yon oynaga parda o‘rnatish huquqini qo‘lga kiritish uchun bir necha yil kurashib, sudma-sud yurilganini eslayman-da, hech bo‘lmasa shunisiga ham shukr deb qo‘yaman ichimda. Qonunda shundoq ham bor huquqlarga shuncha kurashdik, yo‘g‘iga erishish yanada qiyin-ov”, — deb yozadi Xushnudbek Xudoyberdiyev.
Avvalroq O‘zbekistonda yuk mashinalari va avtobuslarning oynalarini “tonirovka” qilishga ruxsat berilgani hamda “tonirovka” uchun ruxsatnomani onlayn shaklda olish mumkin bo‘lishi haqida xabar berilgandi.
Izoh (0)