Bayden Trampni Amerika xalqi xohishiga hurmatsizlik qilganlikda aybladi

Saylovchilar hay’ati tomonidan AQShning yangi prezidenti etib tasdiqlangan Jozef Bayden amaldagi davlat rahbari Donald Tramp sud orqali ba’zi shtatlarda ovoz berish natijalari bekor qilinishiga erishmoqchi bo‘lib, xalq xohishiga hurmatsizlik ko‘rsatganligini aytdi, deb yozadi “RBK”.

“Bu shunchalik ekstremal pozitsiyaki, bunaqasini ilgari ko‘rmaganmiz. Bu pozitsiya — xalq xohishini tan olishdan bosh tortish, qonun ustuvorligi tamoyilini hurmat qilishdan bosh tortish va Konstitutsiyamizni hurmat qilishdan bosh tortish”, — dedi Bayden Delaver shtatidagi Uilmington shahrida bo‘lib o‘tgan matbuot anjumanida.

Sobiq vitse-prezident Texas shtati prokurori tomonidan prezidentlik saylovi natijalarini to‘rtta shtat — Jorjiya, Michigan, Viskonsin va Pensilvaniyada haqqoniy emas deb topish to‘g‘risidagi da’vosini rad etgan Oliy sud qarorini qo‘llab-quvvatladi. “Bu sud demokratiyamizga hujumda qatnashmasligini bildiruvchi aniq-ravshan signaldir”, — deya qo‘shib qo‘ydi u.

Bayden saylovchilar hay’atining 306 ta ovozini qo‘lga kiritganini eslatib, bu Tramp 2016-yilda ega bo‘lgan (304 ta ovoz) ovozlarga deyarli teng ekanini aytdi. “O‘sha vaqtda uni saylagan saylovchilar sonini juda katta deb baholagan edi. Uning o‘z standartlari bo‘yicha bu natijalar o‘sha vaqtda aniq-ravshan g‘alabani bildirgan, hozirgi natija ham ana shunday ma’noga ega deb endi men ham ayta olaman”, — dedi u.

Demokrat amaldagi prezident unga hokimiyatni tinch yo‘l bilan topshirishiga ishonch bildirdi. “Biz, AQShliklar hokimiyatni tinch yo‘l bilan topshirish borasida doim dunyoga o‘rnak bo‘lib kelganmiz. Va biz yana shunday namuna ko‘rsatamiz”, — dedi sobiq vitse-prezident ishonch bilan.

Saylovchilar hay’atining ovoz berish natijalarini tan olgan Respublikachilar partiyasi vakillari haqida gapirar ekan, Bayden ular bilan samarali ishlay olishini ta’kidladi. Demokratning eslatishicha, o‘zi vitse-prezident bo‘lgan 2016-yildagi saylovlardan keyin kongress palatalarining qo‘shma majlisida Trampning g‘alabasi haqida e’lon qilish aynan uning majburiyatiga kirgan. “Men o‘z majburiyatimni bajardim. Shundan mamnunmanki, senatdagi sobiq respublikachi hamkasblarimning bir qatori allaqachon ovoz berish yakunlarini tan olgan, bundan hayron ham qolmayapman. Ulardan minnatdorman. Va ishonchim komilki, ular bilan ko‘p yo‘nalishlarda mamlakat uchun birga ishlay olamiz”, — deya xulosa qildi Bayden.

Eslatib o‘tamiz, saylovchilar hay’ati ko‘pchilik ovoz bilan demokrat Jo Baydenni AQSh prezidenti saylovlarining g‘olibi deya tasdiqladi. Baydenga 306 saylovchi, uning raqibi, amaldagi AQSh prezidenti Donald Trampga 232 saylovchi ovoz berdi. G‘alaba uchun 270 ta ovoz to‘plash kerak — Bayden ushbu marradan saylovchilarning Kaliforniyadagi majlisidan keyin o‘tgan edi. Ovoz berishda 50 ta shtat va Kolumbiya okrugidan jami 538 saylovchi qatnashdi.

23-dekabrgacha saylovchilar hay’ati ovozlaridan iborat byulletenlar Vashingtonga yetkaziladi. 2021-yil 6-yanvar kuni ovozlar AQSh Kongressi Vakillar palatasi va Senatning qo‘shma majlisida hisoblab chiqiladi. 20-yanvar kuni saylangan prezidentning inauguratsiyasi bo‘lib o‘tadi.