Байден Трампни Америка халқи хоҳишига ҳурматсизлик қилганликда айблади

Сайловчилар ҳайъати томонидан АҚШнинг янги президенти этиб тасдиқланган Жозеф Байден амалдаги давлат раҳбари Дональд Трамп суд орқали баъзи штатларда овоз бериш натижалари бекор қилинишига эришмоқчи бўлиб, халқ хоҳишига ҳурматсизлик кўрсатганлигини айтди, деб ёзади «РБК».

«Бу шунчалик экстремал позицияки, бунақасини илгари кўрмаганмиз. Бу позиция — халқ хоҳишини тан олишдан бош тортиш, қонун устуворлиги тамойилини ҳурмат қилишдан бош тортиш ва Конституциямизни ҳурмат қилишдан бош тортиш», — деди Байден Делавэр штатидаги Уилмингтон шаҳрида бўлиб ўтган матбуот анжуманида.

Собиқ вице-президент Техас штати прокурори томонидан президентлик сайлови натижаларини тўртта штат — Жоржия, Мичиган, Висконсин ва Пенсильванияда ҳаққоний эмас деб топиш тўғрисидаги даъвосини рад этган Олий суд қарорини қўллаб-қувватлади. «Бу суд демократиямизга ҳужумда қатнашмаслигини билдирувчи аниқ-равшан сигналдир», — дея қўшиб қўйди у.

Байден сайловчилар ҳайъатининг 306 та овозини қўлга киритганини эслатиб, бу Трамп 2016 йилда эга бўлган (304 та овоз) овозларга деярли тенг эканини айтди. «Ўша вақтда уни сайлаган сайловчилар сонини жуда катта деб баҳолаган эди. Унинг ўз стандартлари бўйича бу натижалар ўша вақтда аниқ-равшан ғалабани билдирган, ҳозирги натижа ҳам ана шундай маънога эга деб энди мен ҳам айта оламан», — деди у.

Демократ амалдаги президент унга ҳокимиятни тинч йўл билан топширишига ишонч билдирди. «Биз, АҚШликлар ҳокимиятни тинч йўл билан топшириш борасида доим дунёга ўрнак бўлиб келганмиз. Ва биз яна шундай намуна кўрсатамиз», — деди собиқ вице-президент ишонч билан.

Сайловчилар ҳайъатининг овоз бериш натижаларини тан олган Республикачилар партияси вакиллари ҳақида гапирар экан, Байден улар билан самарали ишлай олишини таъкидлади. Демократнинг эслатишича, ўзи вице-президент бўлган 2016 йилдаги сайловлардан кейин конгресс палаталарининг қўшма мажлисида Трампнинг ғалабаси ҳақида эълон қилиш айнан унинг мажбуриятига кирган. «Мен ўз мажбуриятимни бажардим. Шундан мамнунманки, сенатдаги собиқ республикачи ҳамкасбларимнинг бир қатори аллақачон овоз бериш якунларини тан олган, бундан ҳайрон ҳам қолмаяпман. Улардан миннатдорман. Ва ишончим комилки, улар билан кўп йўналишларда мамлакат учун бирга ишлай оламиз», — дея хулоса қилди Байден.

Эслатиб ўтамиз, сайловчилар ҳайъати кўпчилик овоз билан демократ Жо Байденни АҚШ президенти сайловларининг ғолиби дея тасдиқлади. Байденга 306 сайловчи, унинг рақиби, амалдаги АҚШ президенти Дональд Трампга 232 сайловчи овоз берди. Ғалаба учун 270 та овоз тўплаш керак — Байден ушбу маррадан сайловчиларнинг Калифорниядаги мажлисидан кейин ўтган эди. Овоз беришда 50 та штат ва Колумбия округидан жами 538 сайловчи қатнашди.

23 декабргача сайловчилар ҳайъати овозларидан иборат бюллетенлар Вашингтонга етказилади. 2021 йил 6 январь куни овозлар АҚШ Конгресси Вакиллар палатаси ва Сенатнинг қўшма мажлисида ҳисоблаб чиқилади. 20 январь куни сайланган президентнинг инаугурацияси бўлиб ўтади.