Avstriya harbiy kinologiya markazi ishlatilgan tibbiy niqoblarda koronavirus infeksiyasini hidi orqali topishga o‘rgatilgan birinchi xizmat itini tanishtirdi, deb yozadi “RBK” Avstriya mudofaa vazirligiga tayanib.
Virus bor-yo‘qligini aniqlash birinchi bo‘lib, Zetalblik shahridagi Fantasy Forever laqabli Belgiya ovcharkasi o‘rgandi. U itlar COVID-19’ga chalinganlarni sog‘lom odamlardan ajrata olish-olmasligini ko‘rsatib berishi kerak bo‘lgan maxsus tadqiqot dasturida qatnashmoqda.
Ovcharka sinovlarning birinchi bosqichidan o‘tgan, endi amaliy bosqich boshlangan. Itni o‘rgatish uchun olti oy vaqt va ming dona himoya niqobi kerak bo‘ldi.
Yana bir it sinovlarning birinchi bosqichini tez orada yakunlaydi. 2021-yilgacha avstriyalik kinologlar yana ikkita itni tayyorlashni rejalashtirmoqda. Tadqiqot yakunlari kelasi yilning birinchi choragida e’lon qilinadi.
Finlyandiyaning Xelsinki-Vantaa aeroportida ishlayotgan itlar koronavirusni testlardan ko‘ra tezroq aniqlayotgani xabar berilgan edi. Sinov jarayonida bir kun davomida itdan foydalangan holda 100 ga yaqin yo‘lovchi tekshiruvdan o‘tkazilgan. Aeroportga kelgan yo‘lovchilardan navbatga turish va terisini salfetka bilan artish so‘ralgan. Shundan so‘ng salfetkalar bankaga joylashtirilib, itlarga hidlash uchun berilgan. Hayvonlar ma’lum bir harakatlar bilan kasallik ehtimolligini ko‘rsatishga o‘rgatilgan. Agarda it xodimlarni “test ijobiy” ekanligi to‘g‘risida ogohlantirsa, yo‘lovchi PZR-tekshiruvdan o‘tishi kerak.
Dubay aeroportida ham COVID-19’ni aniqlash uchun harbiy xizmat itlaridan foydalanilayotgani to‘g‘risida xabar berilgandi. Jarayonga ko‘ra itlar koronavirus bilan kasallangan yo‘lovchilarni hididan topib beradi. Tadqiqotlarda ushbu yo‘l orqali kasallanganlarni 92 foiz gacha aniqlash mumkinligi isbotlangan.
Izoh (0)