BioNTech rahbari pandemiyani 2021-yil kuzida nazorat ostiga olishga erishilishini aytdi

AQShda vaksinatsiya jarayoni normal kechgan holda, 2021-yil yozi oxiriga kelib, koronavirus infeksiyasi pandemiyasini nazorat ostiga olishga muvaffaq bo‘lish mumkin. Bu haqda Amerikaning Pfizer farmatsevtik giganti bilan birga COVID-19’ga qarshi vaksina yaratgan Germaniyaning BioNTech bioinjiniring kompaniyasi rahbari Ugur Shahin Fox News’ga bergan intervyusida aytib o‘tdi, deb yozadi “RBK”.

Uning so‘zlariga ko‘ra, amerikaliklarning 30 foizi emlanganidan keyin kasallanish ko‘rsatkichlarida o‘zgarish ko‘rinadi, bu esa apreldayoq yuz berishi mumkin. Shu bilan birga Shahinning tan olishicha, odamlarda doriga va vaksinalarga nisbatan ishonchsizlik bor, ammo uning ishontirishicha, Pfizer/BioNTech vaksinasi xavfsizlik bo‘yicha juda yaxshi ko‘rsatkichlarga ega.

“Yechim topilganini va biz vaksinani ko‘p dozada ishlab chiqara olishimizni bilamiz, bu vaksinalar foyda berishini, qaysilari samarali bo‘lib chiqqanini bilamiz. Shuning uchun bu kasallikni va pandemiyani eng kechi bilan kelasi yoz oxiriga borib nazorat ostiga olishimizga ishonchimiz komil bo‘lishi kerak”, — dedi Shahin.

Shahin 2021-yilda 1,3 milliard doza vaksina ishlab chiqarish mumkinligiga ishonch bildirdi. Ayni paytda bundan ham ko‘proq ishlab chiqarish imkoniyati o‘rganilmoqda.

Shahinning ta’kidlashicha, ommaviy vaksinatsiya va mamlakatlar o‘rtasidagi hamkorlik koronavirus infeksiyasiga qarshi global kurashda hal qiluvchi ahamiyatga ega, u barchani yaqin to‘qqiz oy davomida mana shu narsaga e’tibor qaratishga chaqirdi.

Uning so‘zlariga ko‘ra, BioNTech AQSh hukumatiga kasallik tarqalishini to‘xtatish borasida umumiy harakatlar rejasini taqdim etgan. U ishlab chiquvchilar o‘z dorilarini tezkorlik bilan joriy qila olishiga umid bildirdi, bu esa kasalxonaga yotqiziladigan bemorlar sonini ancha pasaytirgan bo‘lardi. Shahin Buyuk Britaniyada emlash boshlanganini olqishladi va uni “bosqichma-bosqich jarayon” deb atadi.

Pfizer va BioNTech vaksinasi avvalroq AQShda va Meksikada ma’qullangan edi. AQShda endilikda 16 yoshdan katta bo‘lgan amerikaliklar vaksinatsiyadan o‘tishi mumkin. Reuters ma’lumotlariga ko‘ra, yil oxiriga qadar 2,9 million kishini emlash rejalashtirilmoqda; vaksinatsiya jarayonida xavf guruhidagi insonlar — tibbiyot xodimlari va keksalarga ustuvorlik beriladi.

AQSh prezident Donald Trampning ma’lum qilishicha, vaksinaning birinchi dozasi yuborish ishlari “24 soatdan kamroq vaqt ichida” amalga oshiriladi.

Eslatib o‘tamiz, 2-dekabr kuni Buyuk Britaniya dunyoda birinchi bo‘lib Pfizer’ning koronavirusga qarshi vaksinasidan foydalanishni ma’qullagan. Shuningdek, Pfizer va BioNTech vaksinani AQShda hamda Yevroittifoqda ro‘yxatdan o‘tkazish uchun ariza bergan.

Avvalroq Pfizer va BioNTech o‘zining BNT1622b vaksinasi tadqiqotlarning uchinchi bosqichi yakunlari bo‘yicha 95 foiz samaradorlik ko‘rsatganini ma’lum qilgandi. Taqqoslash uchun: Rossiyaning “Sputnik V” vaksinasi samaradorligi o‘z ishlab chiquvchilari tomonidan 92 foizga, Amerika Moderna kompaniyasi vaksinasi — 94,1 foizga, AstraZeneca kompaniyasi vaksinasi — 70 foizga baholangan.