Rossiyada oktabr oyida 47 777 kishi yoki 2019-yilning shu oyiga nisbatan 30,3 foizga ortiq kishi vafot etdi. Bu haqda “Rosstat” xabar berdi, deb yozmoqda Meduza.
Ortiqcha o‘limlar soni bo‘yicha Moskva (3254 kishi), Samara viloyati (2269 kishi), Rostov viloyati (2240 kishi), Chelyabinsk viloyati (2145 kishi) va Oltoy o‘lkasi (1780 kishi) yetakchi bo‘ldi.
Shu bilan birga, “Rosstat” ma’lumotlariga ko‘ra, oktabr oyida koronavirus va uning asoratlaridan jami 15 607 kishi vafot etdi.
“Rosstat” ma’lumotlariga ko‘ra, oktabr oyidan mart oyigacha bo‘lgan butun pandemiya davrida ortiqcha o‘limlar soni 138 325 kishini tashkil qildi.
Ortiqcha o‘limlar 90—100 foiz holatlarda qandaydir tarzda koronavirusga chalinish bilan bog‘liq. Bunga ortiqcha o‘lim holatlari batafsil tahlil qilingan ayrim hududlar hisobotlari guvohlik bermoqda (masalan, aprel oyidan buyon Moskva sog‘liqni saqlash departamenti bu bilan shug‘ullanmoqda). O‘lim haqidagi ma’lumotlarning o‘zi “Rosstat”ga marhumning qarindoshlariga o‘lim haqidagi guvohnoma beruvchi FHDYo idoralaridan kelib tushadi. Bu eng aniq ma’lumot hisoblanadi, ammo har oy yakunidan 35—40 kun o‘tib chop etiladi. Bu esa epidemiya sharoitida juda katta kechikish.
Avvalroq Rossiyada pandemiya boshlanganidan buyon ortiqcha o‘lim holati 120 ming kishini tashkil etgani, bu tezkor shtabning COVID-19 borasidagi ma’lumotlaridan to‘rt barobarga ko‘p ekanligi haqida xabar berilgandi. Keyinroq bosh vazir o‘rinbosari Tatyana Golikova holatga izoh berib, “Rosstat”ning koronavirus bilan bog‘liq o‘lim statistikalari ishonchli ekanligini aytgan.
Izoh (0)