BioNTech раҳбари пандемияни 2021 йил кузида назорат остига олишга эришилишини айтди

АҚШда вакцинация жараёни нормал кечган ҳолда, 2021 йил ёзи охирига келиб, коронавирус инфекцияси пандемиясини назорат остига олишга муваффақ бўлиш мумкин. Бу ҳақда Американинг Pfizer фармацевтик гиганти билан бирга COVID-19’га қарши вакцина яратган Германиянинг BioNTech биоинжиниринг компанияси раҳбари Угур Шаҳин Fox News’га берган интервьюсида айтиб ўтди, деб ёзади «РБК».

Унинг сўзларига кўра, америкаликларнинг 30 фоизи эмланганидан кейин касалланиш кўрсаткичларида ўзгариш кўринади, бу эса апрелдаёқ юз бериши мумкин. Шу билан бирга Шаҳиннинг тан олишича, одамларда дорига ва вакциналарга нисбатан ишончсизлик бор, аммо унинг ишонтиришича, Pfizer/BioNTech вакцинаси хавфсизлик бўйича жуда яхши кўрсаткичларга эга.

«Ечим топилганини ва биз вакцинани кўп дозада ишлаб чиқара олишимизни биламиз, бу вакциналар фойда беришини, қайсилари самарали бўлиб чиққанини биламиз. Шунинг учун бу касалликни ва пандемияни энг кечи билан келаси ёз охирига бориб назорат остига олишимизга ишончимиз комил бўлиши керак», — деди Шаҳин.

Шаҳин 2021 йилда 1,3 миллиард доза вакцина ишлаб чиқариш мумкинлигига ишонч билдирди. Айни пайтда бундан ҳам кўпроқ ишлаб чиқариш имконияти ўрганилмоқда.

Шаҳиннинг таъкидлашича, оммавий вакцинация ва мамлакатлар ўртасидаги ҳамкорлик коронавирус инфекциясига қарши глобал курашда ҳал қилувчи аҳамиятга эга, у барчани яқин тўққиз ой давомида мана шу нарсага эътибор қаратишга чақирди.

Унинг сўзларига кўра, BioNTech АҚШ ҳукуматига касаллик тарқалишини тўхтатиш борасида умумий ҳаракатлар режасини тақдим этган. У ишлаб чиқувчилар ўз дориларини тезкорлик билан жорий қила олишига умид билдирди, бу эса касалхонага ётқизиладиган беморлар сонини анча пасайтирган бўларди. Шаҳин Буюк Британияда эмлаш бошланганини олқишлади ва уни «босқичма-босқич жараён» деб атади.

Pfizer ва BioNTech вакцинаси аввалроқ АҚШда ва Мексикада маъқулланган эди. АҚШда эндиликда 16 ёшдан катта бўлган америкаликлар вакцинациядан ўтиши мумкин. Reuters маълумотларига кўра, йил охирига қадар 2,9 миллион кишини эмлаш режалаштирилмоқда; вакцинация жараёнида хавф гуруҳидаги инсонлар — тиббиёт ходимлари ва кексаларга устуворлик берилади.

АҚШ президент Дональд Трампнинг маълум қилишича, вакцинанинг биринчи дозаси юбориш ишлари «24 соатдан камроқ вақт ичида» амалга оширилади.

Эслатиб ўтамиз, 2 декабрь куни Буюк Британия дунёда биринчи бўлиб Pfizer’нинг коронавирусга қарши вакцинасидан фойдаланишни маъқуллаган. Шунингдек, Pfizer ва BioNTech вакцинани АҚШда ҳамда Евроиттифоқда рўйхатдан ўтказиш учун ариза берган.

Аввалроқ Pfizer ва BioNTech ўзининг BNT1622b вакцинаси тадқиқотларнинг учинчи босқичи якунлари бўйича 95 фоиз самарадорлик кўрсатганини маълум қилганди. Таққослаш учун: Россиянинг «Спутник V» вакцинаси самарадорлиги ўз ишлаб чиқувчилари томонидан 92 фоизга, Америка Moderna компанияси вакцинаси — 94,1 фоизга, AstraZeneca компанияси вакцинаси — 70 фоизга баҳоланган.