Rossiyalik deputat tok-shouda Qozog‘iston hududini “Rossiyaning sovg‘asi” deb atadi. Qozog‘iston TIVga Rossiya diplomati chaqirildi

Rossiya davlat dumasining ta’lim va fan qo‘mitasi raisi Vyacheslav Nikonovning Qozog‘iston hududining katta qismi aslida qozoqlarga Rossiya tomonidan sovg‘a qilingani haqidagi gaplaridan keyin Qozog‘iston Tashqi ishlar vazirligi Rossiyaning vaqtinchalik ishonchli vakili Aleksandr Komarovni chaqirib oldi. Bu haqda Meduza xabar bermoqda.

Idora rossiyalik diplomatga rasmiy shaxs tomonidan jamoatchilik oldida aytilgan bunday gaplardan taajjublanish izhor etilgan notani topshirdi. TIVda qayd etishlaricha, “rossiyalik ba’zi siyosatchilarning Qozog‘istonga nisbatan gij-gijlovchi xurujlari ko‘payib qolishi ittifoqdoshlik munosabatlariga jiddiy zarar yetkazadi”.

Qozog‘iston TIVning bunday munosabatiga sabab bo‘lgan gap Nikonov tomonidan “Birinchi kanal”dagi “Katta o‘yin” ko‘rsatuvi efirida aytilgan edi.

“Qozog‘iston o‘zi mavjud emasdi, shimoliy Qozog‘istonga umuman qadam bosilmagan edi. Ular ancha janubroqda yashar edi. Aslini olganda , Qozog‘iston hududi — bu Rossiya va Sovet ittifoqi tomonidan berilgan katta sovg‘a”, — dedi Nikonov.

“Qozog‘iston TIV Rossiya tomonidan bunday gaplarga tegishlicha baho berilishini kutmoqda va bundan keyin Rossiya Federatsiyasi davlat arboblarining bunday bayonotlar berishiga yo‘l qo‘ymaslik bo‘yicha choralar ko‘rishga chaqiradi. Rossiya diplomatiga Qozog‘iston TIV pozitsiyasi ifoda etilgan nota topshirildi”, — deyiladi vazirlik xabarida.

Meduza qayd etishicha, Rossiya federal telekanallaridagi siyosiy tok-shoular efirlari ishtirokchilari sobiq ittifoq respublikalari o‘z hududlari yoki SSSR davrida ularga kiritilgan manbalar uchun Rossiyadan minnatdor bo‘lishi kerakligi haqida muntazam ravishda fikr bildiradi. Ko‘pincha bunday fikrlar Ukrainaga tegishli bo‘ladi. Odatda bunday bayonotlar rasmiy muassasalar tomonidan e’tiborsiz qoldiriladi.

Avvalroq Putin SSSR respublikalariga “rus xalqi tomonidan berilgan sovg‘alarni” eslab o‘tgan edi. “Sovet Ittifoqini tashkil etish bitimida undan chiqish huquqi haqida yozilgan, biroq jarayon haqida hech narsa deyilmagani sabab savol yuzaga keladi: biror-bir respublika Sovet Ittifoqi tarkibiga kirsa, biroq Rossiyaning ulkan yerlariga, Rossiyaning tarixiy hududlariga ega bo‘lib, to‘satdan ittifoq tarkibidan chiqishga qaror qilsa, hech bo‘lmaganda qanday kirgan bo‘lsa, shunday chiqsin. O‘zi bilan rus xalqining sovg‘alarini olib ketmasin. Axir bularning hech biri yozilmagan. Mutlaqo ishonchim komilki, Konstitutsiyaga o‘zgartirish kiritib to‘g‘ri qilyapmiz”, — deydi Rossiya prezidenti.