Parij prokuraturasi korrupsiyada ayblanayotgan Fransiyaning sobiq prezidenti Nikolya Sarkozini ikki yili shartli bo‘lgan to‘rt yilga ozodlikdan mahrum qilishni talab qildi. Bu haqda Le Parisien’ga tayanib, “RBK” xabar berdi.
Ushbu ishda Sarkozining advokati Tyerri Erzog va kassatsiya sudining sobiq yuqori lavozimli xodimi Gilbert Aziber ham ayblanmoqda. Ularning har biriga prokuratura shu kabi jazoni talab qilgan.
65 yoshli siyosatchi Aziber 2014-yilda Sarkoziga nisbatan o‘tkazilgan boshqa bir tergov to‘g‘risidagi ma’lumotlarni noqonuniy olishga urinishda ayblanmoqda. Ushbu tergov ishi 2007-yilda uning prezidentlik kampaniyasi L’Oreal asoschisining qizi Lilian Bettenkur tomonidan moliyalashtirilishi bilan bog‘liq bo‘lgan. Eski ish doirasida sobiq prezident Bettenkurning Alsgeymer kasalligiga chalinganidan foydalanib, undan 2007-yilgi saylov kampaniyasi uchun pul olishda ayblangan, ammo keyinchalik bu ish yopilgan.
Huquq-tartibot organlari sobiq prezident o‘z advokati orqali Aziberga maxfiy ma’lumotlar evaziga Monakoda yangi va obro‘li lavozimni egallashda yordam berishga va’da qilganlikda gumonlangan. Tergov organlarida Sarkozining ushbu mavzu bo‘yicha telefon suhbatlariga oid ko‘plab yozuvlar bor.
Le Parisien’da qayd etilishicha, bu ishda o‘z aybini rad etayotgan shaxslar 10 yilgacha ozodlikdan mahrum etilishi va 1 million yevrogacha jarimaga tortilishi mumkin. Sarkozining o‘zi hech qachon Aziberga yordam berishga urinmaganini va u hech qachon Monakoda lavozim olmaganini aytgan.
Parijda sobiq prezident ustidan sud jarayoni noyabr oxirida qayta boshlandi. 2007—2012-yillarda Fransiya rahbari bo‘lgan Sarkozi ushbu ish ochilishini “mamlakat tarixida qoladigan mojaro” deb atagan.
Fransiya OAVlarining yozishicha, bu mamlakatning urushdan keyingi tarixida sobiq prezident sud ishida shaxsan ishtirok etgan birinchi holat. Sarkozidan avval 2011-yilda Jak Shirak sud qilingan, ammo u sog‘lig‘i tufayli hech qachon sud majlisiga bormagan.
Izoh (0)