Yevroittifoq hududiga kirmoqchi bo‘lganlar uchun talablar kuchaytirilmoqda

Yevroittifoqda 8-dekabr kuni YEI davlatlariga qisqa va uzoq muddatli viza oluvchilarga qo‘yiladigan yangi talablar dastlabki tarzda ko‘rib chiqilib, ma’qullandi. “Korrespondent.net”ning xabar berishicha, bu haqda YeI kengashi matbuot xizmati ma’lum qildi.

Yangi kelishuvga ko‘ra, jumladan, biometrik ma’lumot yig‘ish bo‘yicha talab yangilanmoqda. Yangi bazada qog‘oz fotosuratlardan emas, faqat yuqori aniqlikdagi raqamli suratlardan foydalaniladi. Barmoq izlarini topshirishi shart bo‘lgan bolalarning yoshi 12 dan 6 yoshgacha pasaytirildi.

Qaror oraliq tusga ega bo‘lib, uning kuchga kirishi uchun yana qator yuridik bosqichlar talab qilinadi. Shu sababli uning kuchga kirishi sanasi hali belgilanmagan.

Hujjatda aytilishicha, ushbu kelishuv har qanday qisqa muddatli viza taqdim etishda uni oluvchi to‘g‘risida YeIning barcha migratsion va politsiya bazalaridan ma’lumot yig‘ilishini nazarda tutadi.

Hozirgi vaqtda viza oluvchilarning ushbu ma’lumotlar bazalariga nisbatan tekshirish tasodifiy va faqat qisman avtomatlashtirilgan rejimda amalga oshirilmoqda. Yangi tizim viza olish uchun murojaat etuvchilarning 100 foiz tekshiruvdan o‘tishini ta’minlashi kerak.