Turkiya Rossiyaning koronavirusga qarshi vaksinasini sotib olishdan bosh tortdi. Bu haqda Turkiya sog‘liqni saqlash vaziri Faxrettin Ko‘ja ma’lum qildi, deb yozmoqda Meduza.
Vazirning so‘zlariga ko‘ra, vaksina ishonchli laboratoriya amaliyoti prinsiplariga mos kelmaydi.
“Rossiya (bu shartlarni) bajara olmadi. Shu tariqa, JSST va butun dunyo uchun bu vaksinani sotib olish imkonsiz ko‘rinmoqda. Biz ham undan foydalanish uchun ruxsat bera olmaymiz. Shu sababli u bizning qiziqishimiz doirasidan chiqdi”, — deya ma’lum qilgan Turkiya sog‘liqni saqlash vaziri.
“Sputnik V” vaksinasini yaratish ishlarini boshqargan Rossiya to‘g‘ridan to‘g‘ri investitsiyalar jamg‘armasidagi manbaning “TASS”ga ma’lum qilishicha, Turkiyaning vaksinadan bosh tortgani haqidagi ma’lumot ishonchsiz. Uning so‘zlariga ko‘ra, muzokaralar davom etmoqda. “Vazirning gaplari — soxta xabar”, — deya ta’kidlagan manba.
Turkiyada koronavirusga qarshi emlash 11-dekabrdan boshlanadi. Buning uchun Xitoy vaksinasidan foydalaniladi. Biroq Turkiya prezidenti Rajab Toyyib Erdo‘g‘on mamlakat vaksina sotib olish bo‘yicha nafaqat Xitoy, balki Rossiya bilan ham muzokara olib borayotgani haqida gapirgan.
Rossiya Sog‘liqni saqlash vazirligi noyabr oyida Turkiya “Sputnik V” vaksinasini ishlab chiqarishni tashkil qilishga qiziqish bildirganini ma’lum qilgan. Undan avval esa turkiyalik rasmiylar vaksinaning toksikologik sinovini o‘tkazishni xohlagan.
Eslatib o‘tamiz, Rossiya Sog‘liqni saqlash vazirligining Gamaleya instituti tomonidan ishlab chiqilgan va “Sputnik V” vaksinasi 11-avgustda ro‘yxatdan o‘tkazilgan. Vaksina klinik sinovlari uchinchi bosqichining oraliq tahlil natijalari 92 foiz samaradorlikni tashkil etishini ko‘rsatdi. Dekabr oyi boshlarida vaksina ikkita komponentining maksimal narxi ma’lum qilindi.
Izoh (0)