AQSh Moliya vazirligi iqtisodiyotni kuchaytirishga 916 mlrd dollar ajratishni taklif qildi

AQSh Moliya vazirligi Kongressga COVID-19 pandemiyasi sharoitida iqtisodiyotni kuchaytirishga qaratilgan tezkor choralar uchun 916 milliard dollar ajratishni taklif qildi. Bu haqda mamlakat moliya vaziri Stiven Mnuchin Twitter’da ma’lum qildi, deb yozadi “RBK”.

“Men prezident nomidan 916 milliard dollarlik taklifni taqdim etdim, bu 908 milliardlik ikki partiyali taklifdan ancha yirikroq paket hisoblanadi”, — dedi u.

Dekabr boshida Senat a’zolari guruhi 908 milliard dollarlik iqtisodiyotni rivojlantirish choralari paketi variantini taqdim etgan edi. Taklifni ham Demokratlar, ham Respublikachilar partiyasidan senatorlar taqdim etdi.

Mnuchinning ta’kidlashicha, rivojlantirish doirasida mablag‘larning bir qismini Moliya vazirligi ajratadi, shu jumladan, 140 milliard dollarni ish haqini qo‘llab-quvvatlash dasturining foydalanilmagan mablag‘laridan, 429 milliard dollarni esa Moliya vazirligi jamg‘armalaridan olish rejalashtirilmoqda.

Demokratlar tomonidan nazorat qilinuvchi Vakillar palatasi hamda ko‘pchilik o‘rinni respublikachilar egallagan Senat kuchaytirish choralari paketining hajmi borasida bahslashishda davom etmoqda. Demokratlar fikricha, qo‘llab-quvvatlash qiymati 2 trillion dollardan oshishi kerak, Respublikachilar esa 1 milliard dollardan ko‘p bo‘lmasligini talab qilmoqda.

Avvalroq Amerika ma’muriyati Kongressning roziligi bilan koronavirus sharoitida iqtisodiyotni qo‘llab-quvvatlash uchun 3 trilliondan ortiq mablag‘ ajratgan edi. Pandemiya sababli moliyaviy yordamning birinchi paketini AQSh prezidenti Donald Tramp mart oxirida imzolagan edi. O‘shanda iqtisodiyotni kuchaytirishga 2 trillion dollardan ortiq mablag‘ yo‘naltirilgan edi.

Ushbu moliyalashtirish paketi mamlakat tarixidagi eng yirigi bo‘ldi. Mablag‘ sog‘liqni saqlash tizimini qo‘shimcha moliyalashtirishga, biznesni qo‘llab-quvvatlashga, amerikaliklarga to‘g‘ridan to‘g‘ri to‘lovlarga, shuningdek, ishsizlik nafaqasini vaqtinchalik oshirishga yo‘naltirildi.