Toshkent shahrida koronavirus bilan kasallangan va unga gumon qilingan bemorlarni saralash va taqsimlash uchun “O‘zekspomarkaz” ko‘rgazmalar majmuasi va “Universal” sport majmuasida tashkil qilingan saralash va taqsimlash markazlari yopildi. Bu haqda Sog‘liqni saqlash vazirligi xabar berdi.
“Toshkent shahrida epidemiologik vaziyatning barqarorlashayotgani inobatga olinib, koronavirusga chalingan va gumon qilingan bemorlarga muolaja uzluksizligini ta’minlash va infeksiyaga qarshi kurashga ixtisoslashgan kuchlarning tarqoqligiga barham berish maqsadida Yunusobod tumanidagi ‘O‘zekspomarkaz’ning 3 va 4-pavilyonlaridagi saralash va taqsimlash markaziga va ‘Universal’ sport majmuasidagi saralash va taqsimlash markaziga koronavirusga chalingan va unga gumon qilingan bemorlarni qabul qilish to‘xtatildi”, — deyiladi vazirlik xabarida.
Bu muassasalarda davolanayotgan bemorlar Zangiota tumanidagi yuqumli kasalliklar shifoxonasiga ko‘chiriladi. Ushbu vaqtinchalik shifoxonalarda faoliyat yuritayotgan tibbiyot xodimlari bilan mehnat shartnomalari tegishli tartibda bekor qilinib, ular avvalgi ish joylariga qaytariladi.
Vazirlikning bildirishicha, hozirda mamlakatda pandemiya xavfi nisbatan kamaygani tufayli koronavirusga chalingan bemorlarni davolash bilan shug‘ullanadigan 159 ta tibbiyot muassasasidan faqat 32 tasi faoliyat yuritmoqda.
Avvalroq Toshkent shahrida koronavirusga qarshi kurashishda aholiga qulaylik yaratish maqsadida ochilgan “Atlas”, “Yoshlik” markazlari vaqtinchalik yopilgandi. Kasallik dinamikasi oshganda yopilgan obyektlar tezkor ravishda qayta ochiladi.
Eslatib o‘tamiz, Prezident Shavkat Mirziyoyev raisligida 17-noyabr kuni bo‘lib o‘tgan videoselektorda O‘zbekiston bo‘yicha 89 ta muassasada 17 500 ta o‘rin COVID-19 bilan kasallanganlar uchun ajratilgani hamda ushbu o‘rinlarda 6570 nafar bemor davolanayotgani va koykalar bandligi respublika bo‘yicha esa 38 foizni tashkil etishi ma’lum qilingandi. Shu munosabat bilan, mutasaddilarga koronavirusga ixtisoslashgan shifoxonalar faoliyatini chuqur o‘rganib, ularni optimizatsiya qilish topshirig‘i berilgandi.
O‘zbekiston sog‘liqni saqlash vaziri Abduhakim Hojiboyev 7-dekabr kuni mamlakatda koronavirus pandemiyasi bilan bog‘liq vaziyat hozircha barqarorligini, lekin bu xotirjamlikka berilish uchun asos bo‘la olmasligini ma’lum qildi. SSV rahbari COVID-19’ning ikkinchi to‘lqinidan qochib bo‘lmasligini, buning uchun mamlakatda unga tayyorgarlik ko‘rish bo‘yicha ishlar olib borilayotganini ta’kidlagan.
Izoh (0)