Париж прокуратураси коррупцияда айбланаётган Франциянинг собиқ президенти Николя Саркозини икки йили шартли бўлган тўрт йилга озодликдан маҳрум қилишни талаб қилди. Бу ҳақда Le Parisien’га таяниб, «РБК» хабар берди.
Ушбу ишда Саркозининг адвокати Тьерри Эрзог ва кассация судининг собиқ юқори лавозимли ходими Гильберт Азибер ҳам айбланмоқда. Уларнинг ҳар бирига прокуратура шу каби жазони талаб қилган.
65 ёшли сиёсатчи Азибер 2014 йилда Саркозига нисбатан ўтказилган бошқа бир тергов тўғрисидаги маълумотларни ноқонуний олишга уринишда айбланмоқда. Ушбу тергов иши 2007 йилда унинг президентлик кампанияси L’Oreal асосчисининг қизи Лилиан Беттенкур томонидан молиялаштирилиши билан боғлиқ бўлган. Эски иш доирасида собиқ президент Беттенкурнинг Альцгеймер касаллигига чалинганидан фойдаланиб, ундан 2007 йилги сайлов кампанияси учун пул олишда айбланган, аммо кейинчалик бу иш ёпилган.
Ҳуқуқ-тартибот органлари собиқ президент ўз адвокати орқали Азиберга махфий маълумотлар эвазига Монакода янги ва обрўли лавозимни эгаллашда ёрдам беришга ваъда қилганликда гумонланган. Тергов органларида Саркозининг ушбу мавзу бўйича телефон суҳбатларига оид кўплаб ёзувлар бор.
Le Parisien’да қайд этилишича, бу ишда ўз айбини рад этаётган шахслар 10 йилгача озодликдан маҳрум этилиши ва 1 миллион еврогача жаримага тортилиши мумкин. Саркозининг ўзи ҳеч қачон Азиберга ёрдам беришга уринмаганини ва у ҳеч қачон Монакода лавозим олмаганини айтган.
Парижда собиқ президент устидан суд жараёни ноябрь охирида қайта бошланди. 2007—2012 йилларда Франция раҳбари бўлган Саркози ушбу иш очилишини «мамлакат тарихида қоладиган можаро» деб атаган.
Франция ОАВларининг ёзишича, бу мамлакатнинг урушдан кейинги тарихида собиқ президент суд ишида шахсан иштирок этган биринчи ҳолат. Саркозидан аввал 2011 йилда Жак Ширак суд қилинган, аммо у соғлиғи туфайли ҳеч қачон суд мажлисига бормаган.
Изоҳ (0)