Ukrainada 2021-yil 8-yanvardan koronavirus tarqalishiga qarshi kurashish uchun qat’iy cheklov choralari kuchga kiradi. Bu haqda Ukraina bosh vaziri Denis Shmigal hukumat majlisida ma’lum qildi, deb yozmoqda. Meduza.
“Vaziyat murakkab, biroq biz ba’zi ijobiy tendensiyalarni ko‘ryapmiz, 2020-yilning oxirigacha uch hafta qoldi va hukumat bu davrda qat’iy karantin joriy etmaslikka qaror qildi”, — dedi bosh vazir.
Karantin 24-yanvarga qadar joriy etiladi hamda kinoteatrlar, sport zallari, savdo markazlari, nooziq-ovqat mahsulotlari do‘konlari ishiga cheklov qo‘yishni ko‘zda tutadi, shuningdek, kafe va restoranlar faqat yetkazib berish xizmati uchun ishlaydi.
Barcha o‘quv muassasalari ta’tilga chiqadi, karantin vaqtida har qanday ko‘ngilochar, reklama, sport, madaniy, ommaviy tadbirlar taqiqlanadi.
Oziq-ovqat do‘konlari, dorixonalar, banklar va mehmonxonalar o‘z ishini davom ettiradi. Bundan tashqari, jamoat transporti harakati to‘xtatilmaydi.
2020-yilning noyabr oyi o‘rtasidan Ukrainada dam olish kunlari karantin amal qilgandi va shu kunlarda umumiy ovqatlanish muassasalari, savdo markazlari va ko‘ngilochar muassasalar ishi taqiqlangandi. Dekabr oyining boshida Ukraina hukumati mazkur karantinni uzaytirmaslikka qaror qilgan, mamlakat Sog‘liqni saqlash vazirligi esa qat’iyroq cheklovlarni joriy etishni tavsiya qilgan.
Rasmiy ma’lumotlarga ko‘ra, hozirgi paytga qadar Ukrainada koronavirus bilan kasallanish bo‘yicha qariyb 868 mingta holat qayd etilgan, kasallik oqibatida 14,7 ming kishi halok bo‘lgan. So‘nggi bir sutka ichida mamlakatda 12,9 mingta yangi holat aniqlangan.
Izoh (0)