Erdo‘g‘on Tog‘li Qorabog‘dagi urush tugashi sharafiga uyushtiriladigan harbiy paradda ishtirok etish uchun Bokuga tashrif buyurdi

Turkiya prezidenti Rajab Toyyib Erdo‘g‘on Ozarbayjonga ikki kunlik tashrif bilan keldi. Bu haqda “TASS” xabar berdi.

Ma’lum qilinishicha, Turkiya prezidenti Ozarbayjon poytaxti Boku shahri markazidagi “Ozodlik” maydonida Tog‘li Qorabog‘dagi jangovar harakatlar tugashi sharafiga 10-dekabr kuni bo‘lib o‘tadigan harbiy paradda ishtirok etadi.

Bundan tashqari, diplomatik manbalar ma’lumotlariga ko‘ra, Erdo‘g‘on 10-dekabr kuni Ozarbayjon prezidenti Ilhom Aliyev bilan muzokara o‘tkazadi. Uchrashuv yakunida ikki tomonlama hujjatlar imzolanishi kutilmoqda.

Avvalroq Turkiyaning hukmron partiyasi hisoblanadigan Adolat va taraqqiyot partiyasi matbuot kotibi Omer Chelik Erdo‘g‘onning Ozarbayjonga safarini tarixiy tashrif deb atagan. Uning qayd etishicha, Turkiya prezidenti Bokuga “Ozarbayjon Qurolli kuchlarini tabriklash uchun” tashrif buyuradi.

Tog‘li Qorabog‘dagi Ozarbayjon va Armaniston o‘rtasidagi yangi qurolli to‘qnashuv 27-sentabrdan 9-noyabrgacha davom etdi. Urush boshlangach, Erdo‘g‘on “Ozarbayjonga hujum qilgan” Armanistonni qoraladi va uni bosib olingan hududlarni tark etishga chaqirdi.

Armaniston 28-sentabr kuni Ozarbayjon tomonida yollanma harbiylar jang qilayotganini va Turkiyaning harbiy texnikasi va qurollaridan foydalanayotganini ma’lum qildi. Anqara va Boku bu ma’lumotni rad etdi.

Urushayotgan ikki tomon o‘rtasida o‘t ochishni to‘xtatish haqidagi kelishuv imzolanishi arafasida Ilhom Aliyev Ozarbayjonga tajovuz qilinsa, Turkiyadan harbiy yordam so‘rashga tayyorligini ma’lum qilgandi.