Rossiya Davlat dumasi deputatlari mamlakatning sobiq prezidentlarining daxlsizligini kafolatlovchi qonunni uchinchi o‘qishda qabul qildi. Bu haqda Meduza xabar berdi.
Qonunga ko‘ra, sobiq prezidentning jinoiy yoki ma’muriy javobgarlikka tortilmasligi, uni hibsda ushlab turish, so‘roq qilish, tintuv o‘tkazish kabi choralarni qo‘llamaslik kafolatlanadi.
Qabul qilingan hujjatga ko‘ra, “O‘z lavozimini tark etgan Rossiya Federatsiyasi prezidenti va uning oilasi kafolatlari to‘g‘risida”gi federal qonunning uchinchi bandiga o‘zgartirish kiritildi. Ushbu o‘zgarish sobiq prezidentning jinoiy yoki ma’muriy javobgarlikka tortilmasligini, uni hibsda ushlab turish, so‘roq qilish, tintuv o‘tkazish kabi choralarni qo‘llamaslikni kafolatlaydi. Shuningdek, bu tartib uning barcha mol-mulki, hujjatlari, yuki va yozishmalariga ham amal qiladi.
Qonunning oldingi tahririga ko‘ra, sobiq prezidentni faqat o‘z vakolatini egallab turgan muddati davomidagi faoliyati uchun jinoiy javobgarlikka tortish mumkin emas edi.
Qonunga ko‘ra, sobiq prezident Duma tomonidan davlatga xiyonatda ayblansagina, undan daxlsizlik huquqi olib tashlanishi mumkin.
Sobiq prezidentlarning daxlsizligini kafolatlash to‘g‘risidagi qonun loyihasi 5-noyabr kuni Davlat dumasiga taqdim etilgan edi. Davlat dumasi hujjatni birinchi ko‘rib chiqishdayoq, 17-noyabr kuni qabul qildi.
Meduza’ning yozishicha, yangi qabul qilingan qonun federal qonunchilikni Rossiya konstitutsiyasining yangi tahririga moslashtiradi.
“Qonun sobiq prezidentlarga iste’foga chiqqanida ko‘plab jinoyatlar va ma’muriy huquqbuzarliklarni sodir etishga ruxsat beradi. Bundan tashqari, qonun sobiq prezidentni daxlsizlik huquqidan mahrum etish jarayonini qiyinlashtiradi”, — deyiladi xabarda.
Izoh (0)