Туркия президенти Ражаб Тоййиб Эрдўғон Озарбайжонга икки кунлик ташриф билан келди. Бу ҳақда «ТАСС» хабар берди.
Маълум қилинишича, Туркия президенти Озарбайжон пойтахти Боку шаҳри марказидаги «Озодлик» майдонида Тоғли Қорабоғдаги жанговар ҳаракатлар тугаши шарафига 10 декабрь куни бўлиб ўтадиган ҳарбий парадда иштирок этади.
Бундан ташқари, дипломатик манбалар маълумотларига кўра, Эрдўғон 10 декабрь куни Озарбайжон президенти Илҳом Алиев билан музокара ўтказади. Учрашув якунида икки томонлама ҳужжатлар имзоланиши кутилмоқда.
Аввалроқ Туркиянинг ҳукмрон партияси ҳисобланадиган Адолат ва тараққиёт партияси матбуот котиби Омер Челик Эрдўғоннинг Озарбайжонга сафарини тарихий ташриф деб атаган. Унинг қайд этишича, Туркия президенти Бокуга «Озарбайжон Қуролли кучларини табриклаш учун» ташриф буюради.
Тоғли Қорабоғдаги Озарбайжон ва Арманистон ўртасидаги янги қуролли тўқнашув 27 сентябрдан 9 ноябргача давом этди. Уруш бошлангач, Эрдўғон «Озарбайжонга ҳужум қилган» Арманистонни қоралади ва уни босиб олинган ҳудудларни тарк этишга чақирди.
Арманистон 28 сентябрь куни Озарбайжон томонида ёлланма ҳарбийлар жанг қилаётганини ва Туркиянинг ҳарбий техникаси ва қуролларидан фойдаланаётганини маълум қилди. Анқара ва Боку бу маълумотни рад этди.
Урушаётган икки томон ўртасида ўт очишни тўхтатиш ҳақидаги келишув имзоланиши арафасида Илҳом Алиев Озарбайжонга тажовуз қилинса, Туркиядан ҳарбий ёрдам сўрашга тайёрлигини маълум қилганди.
Изоҳ (0)