Kattaqo‘rg‘onlik fuqaro tuman prokuraturasidan norozi. Uning fikricha prokuratura XTB mansabdor shaxslarining jinoyatini yashirmoqda

“Daryo”ga Kattaqo‘rg‘on tumanida yashovchi fuqaro Dilshoda Shodmonova murojaat qilib, tuman prokuraturasi xodimlaridan norozi ekanligini bildirdi. Ta’kidlashicha, u 2020-yilning avgust oyida Kattaqo‘rg‘on tuman xalq ta’limi bo‘limining hisobchilari ustidan norozilik bildirib, ariza yozgan. Ushbu ariza asosida o‘tkazilgan tekshiruv jarayonida tuman xalq ta’limi bo‘limida katta kamomad aniqlangan. Biroq oradan uch oy o‘tgan bo‘lishiga qaramasdan prokuratura hech qanday chora ko‘rmagan.

“Daryo” muxbiri Farhod Norbo‘tayev Samarqand viloyat prokuraturasi orqali holatga aniqlik kiritdi.

Samarqand viloyat prokuraturasining ma’lum qilishicha, fuqaro Dilshoda Shodmonova tuman xalq ta’lim bo‘limi va uning tasarrufidagi umumta’lim maktabi mansabdor shaxslari tomonidan ish faoliyati davomida qonun buzilish holatlariga yo‘l qo‘yilganligini bildirib, murojaat qilgan. Arizaga asosan mutaxassislar jalb qilingan holda tergovga qadar tekshiruv harakatlari olib borilgan va XTB mansabdor shaxslari tomonidan ishchi xizmatchilarning oylik ish haqlari hisobidan shakllangan 35 million 677 ming so‘m pul mablag‘lari “Ma’rifatparvar” jamiyatiga ko‘chirib berilmasdan, boshqa maqsadlarga yo‘naltirilib, budjet mablag‘lari talon-toroj qilingani ma’lum bo‘lgan.

Tuman xalq ta’limi bo‘limining markazlashgan hisobxona xodimlari tomonidan 29 ta umumta’lim maktabining o‘qituvchi va ishchi xodimlarining ish haqidan shanbalik uchun ushlangan mablag‘lardan 64 million 895 ming so‘mi tuman davlat soliq inspeksiyasiga taqdim qilingan reyestrlarda 29 ta umumta’lim maktabining o‘qituvchi va ishchi-xizmatchi xodimlarining soliq to‘lovlari uchun o‘tkazilmasdan, markazlashgan hisobxona hisobchilari va ularning yaqin qarindoshlarining mol-mulk va yer solig‘i to‘lovlari uchun asossiz ravishda o‘tkazib berilganligi aniqlangan.

Shuningdek, tumandagi 33, 51 va 56-sonli maktablarda ish haqi va unga tenglashtirilgan to‘lovlarni noto‘g‘ri hisoblanishi natijasida pedagog o‘qituvchilarga majburiy ushlanmalardan tashqari olti holatda 15 million 191 ming so‘mlik ustama va ish haqi hamda unga tenglashtirilgan to‘lovlar ortiqcha hisoblanib, to‘lab berilganligi ma’lum bo‘lgan.

Natijada yuqoridagi holatlarda tuman XTB mansabdor shaxslari tomonidan jami 115 million 763 ming so‘mlik budjet mablag‘lari talon-toroj qilingan.

Mazkur holat yuzasidan 2020-yilning 29-oktabr kuni tuman XTB mansabdor shaxslariga nisbatan Jinoyat kodeksining 167-moddasi 3-qismi “a” bandi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilgan.

Tergov harakatlari davomida tuman xalq ta’limi bo‘limining moliyaviy xo‘jalik faoliyati yuzasidan hujjatli taftish tayinlangan. Ish yuzasidan tuman xalq ta’limi bo‘limi mansabdor shaxslari va uning tasarrufidagi maktab ishchi-xodimlari so‘roq qilingan.

Viloyat prokuraturasi axborot xizmatining qo‘shimcha qilishicha, o‘tkazilgan tekshiruv va uning natijalari bo‘yicha fuqaro Dilshoda Shodmonovaga bir necha marotaba, xususan, oxirgi marotaba 2020-yilning noyabr oyining birinchi o‘n kunligida tuman prokuraturasi binosida aynan uning murojaati yuzasidan jinoyat ishi qo‘zg‘atilganligi va hozirda mutaxassislar jalb qilingan holda hujjatli taftish o‘tkazilayotganligi to‘g‘risida tushuntirish berilgan.

Hozirda tuman prokuraturasi tomonidan mazkur jinoyat ishi yuzasidan dastlabki tergov harakatlari olib borilmoqda.