Rossiya to‘g‘ridan to‘g‘ri investitsiyalar fondi (RTIF) O‘zbekistondagi sheriklariga hamkorlikda investitsiya fondi tuzishni taklif qildi. “Gazeta.uz”ning xabar berishicha, bu haqda RTIF bosh direktorining birinchi o‘rinbosari Anatoliy Braverman 4-dekabr kuni ikki mamlakat ishbilarmon doiralari ishtirokidagi davra suhbatida ma’lum qildi.
“Rossiya va O‘zbekiston Prezidentlari uchrashuvlarida Yaqin Sharq va Osiyoning bir qator davlatlari bilan yaratgan fondlar va platformalarimiz kabi Rossiya va O‘zbekiston o‘rtasida hamkorlikda fond tuzish borasida bir qator muhokamalar o‘tkazdik”, — degan u davra suhbati davomida.
Bravermanning ta’kidlashicha, Rossiyaning BAA, Saudiya Arabistoni, Xitoy va Yaponiyadagi sheriklari bilan ham shunday fondlar mavjud.
Investitsiyalar va tashqi savdo vazirining birinchi o‘rinbosari Laziz Qudratov uchrashuvda O‘zbekiston suveren fondi hisoblangan Tiklanish va taraqqiyot jamg‘armasining ijrochi direktori Shuhrat Vafoyev ishtirok etayotganini bildirgan. “U mamnuniyat bilan ushbu hamkorlikdagi harakat detallarini muhokama qiladi va biz o‘zaro maqbul yechimni topamiz”, — degan Laziz Qudratov.
Bosh vazir o‘rinbosari, investitsiyalar va tashqi savdo vaziri Sardor Umurzoqov tomonlar bunday tuzilmaning ustuvor yo‘nalishlari va ish yo‘nalishlarini belgilab olishi kerakligini ta’kidlagan. “Bu Mubadala (BAAning suveren fondi) bilan bo‘ladigan hamkorlikdan biroz farq qiladi. U yerda o‘ziga xos jihatlar boshqacha”, — degan u.
Bunga javoban Rossiya sanoat va savdo vaziri Denis Manturov “o‘ziga xos jihatlar bir xil” ekanligini aytgan. “O‘ziga xos jihatlar deyarli bir xil. Gap shundaki, ushbu fondni yaratishda har bir davlatning o‘ziga xos xususiyatlari bor. Oxir oqibat bularning barchasi suveren fondlarning qo‘shimcha daromadga ega bo‘lishiga olib keladi”, — degan Denis Manturov.
2018-yilning oktabrida O‘zbekiston va BAA 1 milliard qiymatdagi to‘g‘ridan to‘g‘ri investitsiya fondi tuzgandi.
Izoh (0)