O‘zbekistonda ota-ona qaramog‘idan mahrum bo‘lgan bolalar uchta toifadagi muassasalarda: Sog‘liqni saqlash vazirligi tasarrufidagi bolalar uylari, Xalq ta’limi vazirligiga qarashli mehribonlik uylari, bolalar shaharchalari va ularga tenglashtirilgan SOS bolalar mahallalarida tarbiyalanadi. Bolalarni farzandlikka olishda ushbu muassasalar asosiy o‘rin tutadi. Bu haqda 4-dekabr kuni o‘tkazilgan Odam savdosi va majburiy mehnatga qarshi kurashish Milliy komissiyasining navbatdagi yig‘ilishida so‘z yuritildi. Bu haqda “Daryo” muxbiri xabar berdi.
“Barchamiz yaxshi bilamiz, bugungi kunda respublikamizda vasiylik va homiylik sohasidagi faoliyat Vazirlar Mahkamasi, Xalq ta’limi va Sog‘liqni saqlash vazirliklari hamda mahalliy davlat hokimiyati organlari tomonidan “Vasiylik va homiylik to‘g‘risida”gi qonunga asosan yuritiladi. Voyaga yetmagan bolalarni farzandlikka va oilaga tarbiyaga olish ham vasiylik va homiylik organlarining xulosalariga ko‘ra sudlar tomonidan amalga oshiriladi.
Tahlil qilib ko‘rilganda bolalar uylari, mehribonlik uylari, bolalar shaharchalari va ularga tenglashtirilgan SOS bolalar mahallalaridan bir yilda o‘rtacha 220-230 nafar bola oilalarga farzandlikka berilmoqda”, — dedi Oliy Majlis Senati raisi Tanzila Norboyeva.
“Vasiylik va homiylik organlari tomonidan joriy yilning yanvar–avgust oylari davomida ota-ona qaramog‘idan mahrum bo‘lgan, shuningdek, ijtimoiy yordamga muhtoj bo‘lgan 2 ming 747 nafar bola farzandlikka, 3 ming 954 nafar bola vasiylikka, 1 ming 534 nafar bola homiylikka, 288 nafar bola oilaga tarbiyaga (patronatga) berilgan. Bundan ko‘rish mumkinki, vasiylik va homiylik organlari orqali farzandlikka berilgan bolalar orasida mehribonlik uylari va bolalar shaharchalarida tarbiyalanayotgan bolalar ulushi 10 foizni ham tashkil qilmaydi.
90 foizdan ortiq holatlarda farzandlikka oluvchilar bilan farzandlikka beruvchilar o‘zaro bir-birlarini topishmoqda. Ya’ni ular davlat tomonidan tashkil qilingan tashkilotlar orqali emas, balki tanish-bilishchilik, qarindosh-urug‘lar yordamida bolani farzandlikka olishyapti. Mazkur holatlar o‘rganilganda o‘zaro qarindosh bo‘lmagan shaxslar tomonidan farzandlikka olinayotgan bolaning chaqaloq savdosi qurboni bo‘lgan yoki bo‘lmaganligini aniqlash mexanizmi mavjud emasligi ham aniqlandi”, — dedi komissiya raisi.
Mavzuga doir:
- O‘zbekistonda chaqaloqlar savdosi yildan yilga ortib bormoqda. Bunday jinoyatlarning sabablari ma’lum qilindi
- O‘zbekistonda 2021-yilda chin yetim bolalarni uy-joy bilan ta’minlash uchun 30 mlrd so‘m ajratilishi ma’lum qilindi
- Toshkentda ikki yildan buyon Mehribonlik uylari bitiruvchilariga nafaqa to‘lanmayapti. Shahar moliya boshqarmasi bunga izoh berdi
- “Uy yo‘q, hujjat yo‘q, huquq ham yo‘qoladimi?” Mehribonlik uylari bitiruvchilariga uy ajratish muammosi tizimli hal etilishi zarur
- Oliy Majlis Senati yetim bolalarning jamiyatga ijtimoiy moslashuvi yuzasidan bosh vazir nomiga xat yo‘llaydi
Izoh (0)