Ohangaronda noqonuniy tarzda 6800 qutiga yaqin pirotexnika vositalari olib ketayotgan yuk mashinasi aniqlandi
Toshkent viloyatining Ohangaron tumanida yuk bo‘limida 6768 quti pirotexnika vositalari olib ketayotgan Hyundai aniqlandi, deya xabar bermoqda YHXBB axborot xizmati “Daryo”ga.
Ma’lum qilinishicha, Toshkent viloyatining Ohangaron tumanida joylashgan “Chinor” muntazam yo‘l-patrul xizmati maskanida xizmat o‘tayotgan yo‘l-patrul xizmati inspektorlari tungi soat 02:00 atrofida Farg‘ona vodiysidan Toshkent tomon harakatlanib kelayotgan, haydovchi Sodirbek Qodirov boshqaruvidagi Hyundai rusumli, davlat raqam belgisi 50 V 421 NA bo‘lgan transport vositasini to‘xtatadi.
Tekshiruv vaqtida avtomashina yukxonasida hech qanday tegishli hujjatlari bo‘lmagan 6768 quti pirotexnika vositalari topildi. Ular Oxangaron tuman IIBga topshirildi. Ta’kidlanishicha, haydovchiga nisbatan tegishli tartibda chora ko‘riladi.
Ma’lumot uchun, pirotexnika vositalarini saqlash, ishlab chiqish, tashish, jo‘natish, foydalanish, mamlakat hududiga noqonuniy yo‘llar bilan olib kirish, olib chiqish yoki o‘tkazish bilan shug‘ullangan shaxslarga nisbatan Ma’muriy javobgarlik to‘g‘risidagi kodeksining 185-1-moddasiga asosan huquqbuzarlik ashyolari musodara qilinib, bazaviy hisoblash miqdorining 5 barobaridan 20 barobarigacha jarima solinadi.
Avvalroq Toshkent viloyatida noqonuniy pirotexnika va dori vositalari ushlab qolingani, Samarqand shahrida pirotexnika vositalariga bog‘liq noqonuniy holatlar oldini olish maqsadida tezkor tadbir o‘tkazilgani hamda Farg‘onada Mercedes-Benz’da olib ketilayotgan 38 million so‘mlik pirotexnika vositalari to‘xtatib qolingani haqida xabar berilgandi.
