Каттақўрғонлик фуқаро туман прокуратурасидан норози. Унинг фикрича прокуратура ХТБ мансабдор шахсларининг жиноятини яширмоқда

«Дарё»га Каттақўрғон туманида яшовчи фуқаро Дилшода Шодмонова мурожаат қилиб, туман прокуратураси ходимларидан норози эканлигини билдирди. Таъкидлашича, у 2020 йилнинг август ойида Каттақўрғон туман халқ таълими бўлимининг ҳисобчилари устидан норозилик билдириб, ариза ёзган. Ушбу ариза асосида ўтказилган текширув жараёнида туман халқ таълими бўлимида катта камомад аниқланган. Бироқ орадан уч ой ўтган бўлишига қарамасдан прокуратура ҳеч қандай чора кўрмаган.

«Дарё» мухбири Фарҳод Норбўтаев Самарқанд вилоят прокуратураси орқали ҳолатга аниқлик киритди.

Самарқанд вилоят прокуратурасининг маълум қилишича, фуқаро Дилшода Шодмонова туман халқ таълим бўлими ва унинг тасарруфидаги умумтаълим мактаби мансабдор шахслари томонидан иш фаолияти давомида қонун бузилиш ҳолатларига йўл қўйилганлигини билдириб, мурожаат қилган. Аризага асосан мутахассислар жалб қилинган ҳолда терговга қадар текширув ҳаракатлари олиб борилган ва ХТБ мансабдор шахслари томонидан ишчи хизматчиларнинг ойлик иш ҳақлари ҳисобидан шаклланган 35 миллион 677 минг сўм пул маблағлари «Маърифатпарвар» жамиятига кўчириб берилмасдан, бошқа мақсадларга йўналтирилиб, бюджет маблағлари талон-торож қилингани маълум бўлган.

Туман халқ таълими бўлимининг марказлашган ҳисобхона ходимлари томонидан 29 та умумтаълим мактабининг ўқитувчи ва ишчи ходимларининг иш ҳақидан шанбалик учун ушланган маблағлардан 64 миллион 895 минг сўми туман давлат солиқ инспекциясига тақдим қилинган реестрларда 29 та умумтаълим мактабининг ўқитувчи ва ишчи-хизматчи ходимларининг солиқ тўловлари учун ўтказилмасдан, марказлашган ҳисобхона ҳисобчилари ва уларнинг яқин қариндошларининг мол-мулк ва ер солиғи тўловлари учун асоссиз равишда ўтказиб берилганлиги аниқланган.

Шунингдек, тумандаги 33, 51 ва 56-сонли мактабларда иш ҳақи ва унга тенглаштирилган тўловларни нотўғри ҳисобланиши натижасида педагог ўқитувчиларга мажбурий ушланмалардан ташқари олти ҳолатда 15 миллион 191 минг сўмлик устама ва иш ҳақи ҳамда унга тенглаштирилган тўловлар ортиқча ҳисобланиб, тўлаб берилганлиги маълум бўлган.

Натижада юқоридаги ҳолатларда туман ХТБ мансабдор шахслари томонидан жами 115 миллион 763 минг сўмлик бюджет маблағлари талон-торож қилинган.

Мазкур ҳолат юзасидан 2020 йилнинг 29 октябрь куни туман ХТБ мансабдор шахсларига нисбатан Жиноят кодексининг 167-моддаси 3-қисми «а» банди (ўзлаштириш ёки растрата йўли билан талон-торож қилиш) билан жиноят иши қўзғатилган.

Тергов ҳаракатлари давомида туман халқ таълими бўлимининг молиявий хўжалик фаолияти юзасидан ҳужжатли тафтиш тайинланган. Иш юзасидан туман халқ таълими бўлими мансабдор шахслари ва унинг тасарруфидаги мактаб ишчи-ходимлари сўроқ қилинган.

Вилоят прокуратураси ахборот хизматининг қўшимча қилишича, ўтказилган текширув ва унинг натижалари бўйича фуқаро Дилшода Шодмоновага бир неча маротаба, хусусан, охирги маротаба 2020 йилнинг ноябрь ойининг биринчи ўн кунлигида туман прокуратураси биносида айнан унинг мурожаати юзасидан жиноят иши қўзғатилганлиги ва ҳозирда мутахассислар жалб қилинган ҳолда ҳужжатли тафтиш ўтказилаётганлиги тўғрисида тушунтириш берилган.

Ҳозирда туман прокуратураси томонидан мазкур жиноят иши юзасидан дастлабки тергов ҳаракатлари олиб борилмоқда.