Xiaomi kompaniyasi mahsulotlarining Hindistondagi savdolariga ikkinchi bor eng yirik taqiq o‘rnatilishi mumkin. IXBT’ning yozishicha, Philips kompaniyasi Xiaomi’ni sudga berib, Xitoy gigantining qator qurilmalari savdosini taqiqlashni talab qilmoqda.
Philips’dagilarning ta’kidlashicha, Xiaomi HSPA, HSPA+ va LTE’ga oid qator patent qoidalarini buzgan. Ya’ni taqiq ushbu texnologiyalarni qo‘llab-quvvatlaydigan smartfonlarga taalluqli bo‘lishi mumkin. Shuningdek, Philips Dehli Oliy sudidan Xiaomi’ning mobil qurilmalarini mamlakatga olib kirishni taqiqlovchi vaqtinchalik sud qarori chiqarilishini talab qilgan, biroq ushbu so‘rovga javob to‘rt hafta davomida beriladi.
Hozircha ushbu mojaroga oid boshqa tafsilotlar yo‘q. Ishni ko‘rib chiqishning navbatdagi sanasi 18-yanvarga belgilangan.
Eslatib o‘tamiz, Ericsson’ning da’vo arizasiga ko‘ra, 2014-yilda Xiaomi kompaniyasining MediaTek platformalari o‘rnatilgan smartfonlarini Hindiston hududida sotishga taqiq o‘rnatilgan va bu cheklov 2018-yilga kelibgina yechilgan edi.
Eslatib o‘tamiz, 2018-yilda Kaliforniya sudi Janubiy Koreyaning Samsung kompaniyasi patent qoidalarini buzgani uchun Amerikaning Apple korporatsiyasiga 539 million dollar to‘lashi haqida qaror chiqargandi.
Izoh (0)