Xiaomi компанияси маҳсулотларининг Ҳиндистондаги савдоларига иккинчи бор энг йирик тақиқ ўрнатилиши мумкин. IXBT’нинг ёзишича, Philips компанияси Xiaomi’ни судга бериб, Хитой гигантининг қатор қурилмалари савдосини тақиқлашни талаб қилмоқда.
Philips’дагиларнинг таъкидлашича, Xiaomi HSPA, HSPA+ ва LTE’га оид қатор патент қоидаларини бузган. Яъни тақиқ ушбу технологияларни қўллаб-қувватлайдиган смартфонларга тааллуқли бўлиши мумкин. Шунингдек, Philips Деҳли Олий судидан Xiaomi’нинг мобил қурилмаларини мамлакатга олиб киришни тақиқловчи вақтинчалик суд қарори чиқарилишини талаб қилган, бироқ ушбу сўровга жавоб тўрт ҳафта давомида берилади.
Ҳозирча ушбу можарога оид бошқа тафсилотлар йўқ. Ишни кўриб чиқишнинг навбатдаги санаси 18 январга белгиланган.
Эслатиб ўтамиз, Ericsson’нинг даъво аризасига кўра, 2014 йилда Xiaomi компаниясининг MediaTek платформалари ўрнатилган смартфонларини Ҳиндистон ҳудудида сотишга тақиқ ўрнатилган ва бу чеклов 2018 йилга келибгина ечилган эди.
Эслатиб ўтамиз, 2018 йилда Калифорния суди Жанубий Кореянинг Samsung компанияси патент қоидаларини бузгани учун Американинг Apple корпорациясига 539 миллион доллар тўлаши ҳақида қарор чиқарганди.
Изоҳ (0)