Taniqli Ice Universe niki ostidagi insayder Xiaomi’ning navbatdagi flagmani 2020-yil oxiriga qadar namoyish etilishini ma’lum qildi. Aftidan, kompaniya yangi Snapdragon 888 protsessorida ishlaydigan birinchi smartfonini taqdim etishga shoshilmoqda, deb xabar beradi Hi-Tech.Mail.ru.
Insayderning so‘zlariga ko‘ra, Mi 11 barcha tomonlari bukilgan displeyga — “sharshara-ekranga” ega bo‘ladi. Bu kabi texnologiyadan masalan, Huawei P40 Pro’da ham foydalanilgan. Oldinroq tarqalgan mish-mishlarda Xiaomi flagmaniga QHD+ sifatini qo‘llab quvvatlaydigan hamda 120 gerts yangilanish chastotasiga ega displey o‘rnatilishi ma’lum bo‘lgandi.
Shuningdek, kompaniya 200 megapikselli kamera o‘rnatilgan flagman prototipini sinovdan o‘tkazayotgani to‘g‘risida gap-so‘zlar tarqalgan.
Mi 11’ning batafsil texnik tavsifi yoki narxi haqida hozircha ma’lumotlar yo‘q. Agarda Xiaomi rostdan ham yangi qurilmasini shu yilning oxiriga qadar taqdim etmoqchi bo‘lsa, uning taqdimoti sanasi yaqin kunlarda e’lon qilishi kerak.
Eslatib o‘tamiz, joriy haftada Xiaomi Rossiya bozori uchun Mi 10T va Mi 10 T Pro flagmanlarini taqdim etdi — ularga 144 gertsli ekran va Snapdragon 865 protsessori o‘rnatilgan.
Avvalroq Xiaomi yangi smartfonini patentlagani, uning frontal kamerasi maxsus mexanizmda joylashgani to‘g‘risida xabar berilgandi.
Izoh (0)