Sergelidagi qozonxonada o‘rtacha 950 ta hovli uyning bir oylik ehtiyojini qondirishi mumkin bo‘lgan tabiiy gaz o‘g‘irlangani aniqlandi

Toshkentdagi Sergeli tumanini issiqlik energiyasi bilan ta’minlovchi “Toshissiqquvati” DUKga qarashli “Sanoat Energiya” qozonxonasida yirik miqdordagi tabiiy gaz o‘g‘irlangani aniqlandi. Bu haqda Energetika vazirligi matbuot xizmati xabar berdi.

O‘g‘irlik 5-dekabr kuni, issiqlik ta’minoti korxonalarini tabiiy gaz bilan ta’minlash tizimini o‘rganish jarayonida aniqlangan. Qayd etilishicha, “Sanoat Energiya” qozonxonasi ijtimoiy ahamiyatga ega bo‘lgan strategik obyekt bo‘lganligini inobatga olib, uning bir maromda ishlashini ta’minlash maqsadida (boshqa tashkilotlarni tabiiy gazdan uzgan holda) uzluksiz ravishda tabiiy gaz yetkazib berilmoqda.

Shunga qaramasdan, korxona rahbari qozonxonaga kirish gaz quvuriga qozonxonaning gaz hisobdonidan oldin o‘zboshimchalik bilan ulanib, qozonxona hududidagi binoda tabiiy gazdan noqonuniy ravishda foydalangan holda ohak ishlab chiqarish faoliyatini yo‘lga qo‘ygan.

Qozonxona binosining ichki qismida ohak pishirish uchun 2 ta pech va 12 ta nostandart gaz gorelkalarining tabiiy gaz ta’minoti tizimiga rezina shlang orqali ulangani aniqlangan. Ohak pechlarining birida tayyor mahsulot, ikkinchisida ohak toshlari bo‘lgan.

Dastlabki hisob-kitoblarga ko‘ra, ushbu obyektda tabiiy gazni noqonuniy iste’mol qilish hajmi 571,3 ming kub metrni hamda ushbu noqonuniy xatti-harakatlar natijasida gaz ta’minoti tashkilotlariga yetkazilgan zarar 571,3 million so‘mdan ziyodni tashkil etmoqda. Mazkur 571 ming metr kub tabiiy gaz o‘rtacha 950 ta hovli uylarning bir oylik ehtiyojini qondirish imkonini beradi.

“Hududgazta’minot”ning ma’lum qilishicha, sovuq tushishi bilan poytaxtdagi ko‘p qavatli uylarning egalari kvartiralaridagi issiqlik ta’minoti talab darajasida emasligi yoki umuman isitish tizimining yo‘qligi bilan bog‘liq shikoyatlar ko‘paydi. Kuz-qish mavsumida issiqlik ta’minoti uchun mas’ul bo‘lgan qozonxonalar vakillari bahona sifatida buning sababi qilib, gaz yetkazib berishdagi bosimning pastligi bilan izohlagandi.

Ayni paytda “Hududgazta’minot”ning Moddiy resurslardan oqilona foydalanish va korrupsiyaga qarshi siyosatni amalga oshirish boshqarmasi xodimlari tomonidan Bosh prokuratura, Davlat xavfsizlik xizmati va “O‘zneftgazinspeksiya” bilan hamkorlikda qish mavsumi davrida tabiiy gazni o‘g‘irlash bilan bog‘liq holatlar fosh qilinishi davom etmoqda.

Qayd etilgan qonunbuzarlik holatlari bo‘yicha barcha dalil va hujjatlar esa huquqni muhofaza qilish idoralariga taqdim etilgan.