Bugun,

  • USD 11095.31
  • RUB 173.84
  • EUR 10772.44

2020-yil 1-dekabrdan e’tiboran Namangan viloyatidagi to‘rtta hududda aholidan maishiy chiqindilarni olib ketish xizmati mamlakatda ilk bor xususiy korxona tomonidan amalga oshirilmoqda. Bu haqda “Daryo” muxbiri Azizbek Abduvaliyev xabar berdi.

Foto: “Daryo”

Foto: “Daryo”

Viloyat hokimligi, viloyat Ekologiya va atrof-muhitni muhofaza qilish boshqarmasi hamda “Namangan musaffo iqlim” MChJ o‘rtasida tuzilgan davlat-xususiy sheriklik bitimi asosida mazkur jamiyat Namangan shahri, To‘raqo‘rg‘on, Mingbuloq va Namangan tumanlarida ushbu xizmatlarni ko‘rsatish huquqini qo‘lga kiritdi.

Ushbu bitim bo‘yicha davlat sherigi tomonidan 74 ta maxsus avtotransport vositasi 7 yil muddatga bo‘lib to‘lash sharti bilan, 2 ta chiqindilarni joylashtirish poligoni maishiy chiqindilarni saralash va qayta ishlashga investitsiya kiritish sharti bilan 10 yil muddatga, 36 ta maishiy chiqindilarni qabul qilish shoxobchasi va 206 ta chiqindi konteyneri 10 yil muddatga beg‘araz foydalanish uchun taqdim etilmoqda.

Foto: “Daryo”

Foto: “Daryo”

“O‘zbekistonda 2011-yilda shu sohada ish boshlagan ilk tadbirkorlik subyekti bo‘lsak kerak. Endi Namangan viloyatidagi to‘rtta hududda aholidan maishiy chiqindilarni olib ketishga kirishdik. Biz sohaga 7,8 million dollar investitsiya kiritib, Xitoydan 80 ta chiqindi tashuvchi texnika olib kelamiz. 4 ta chiqindilarni saralash va qayta ishlash uskunasi, 50 ta maishiy chiqindilarni to‘plash shoxobchasi va 150 ta chiqindi konteyneri, shuningdek, 3 ta chiqindini qayta yuklash stansiyasini qurib bitkazamiz”, — deydi jamiyat direktori Faxriddin Ibragimov.

Mutasaddilarga ko‘ra, hozirda viloyatning Chust va Kosonsoy tumanlarida ham tadbirkorlar shu paytgacha “Toza hudud” davlat korxonasi tomonidan amalga oshirib kelingan xizmatlarni o‘z zimmasiga olishga qiziqish bildirmoqda.

Foto: “Daryo”

Foto: “Daryo”

Ma’lumot uchun, Namanganda mazkur bitimlarni amalga oshirish natijasida aholini maishiy chiqindilarni tashish xizmati bilan 100 foiz qamrab olish, chiqindilarni qayta ishlash darajasini esa hozirgi 13 foizdan kelgusi yili 38 foizgacha yetkazish rejalashtirilmoqda.

Izoh
Asosiy yangiliklar
Dunyo
Tojikistonda muzliklar erishi tezlashdi. Bu muzliklar deyarli butun Markaziy Osiyoni chuchuk suv bilan ta’minlaydi
Mahalliy
Rossiyada sodir bo‘lgan YTHda bir nafar o‘zbekistonlik halok bo‘ldi, yana to‘rt kishi jarohat oldi
Mahalliy
O‘zbekistonda kelayotgan hafta boshi uchun ob-havo ma’lumoti e’lon qilindi