Chilonzorda eksperiment tariqasida gaz ulanmagan 48 ta xonadon 5 kun elektr energiyasisiz qoldi

24-noyabr kuni Toshkent shahar Chilonzor tumani sektor rahbarlari ishtirokida o‘tkazilgan sayyor qabulda tumanning “Sharof” mahallasi fuqarolari o‘zlari yashayotgan ko‘p qavatli uydagi 48 ta xonadonda 5 kundan buyon elektr energiyasi yo‘qligini ma’lum qildi, deb xabar beradi “Kun.uz”.

“Mahallamizdagi bir nechta uy eksperiment uchun tanlab olingan: gaz ulanmagan, hamma narsa elektrda. Bu uylarda elektrsiz hayot to‘xtaydi – na choy icha olasiz, na ovqat yeya olasiz... Bugun beshinchi kun, svetsiz o‘tiribmiz. Yoqishadi, otib yuboradi; yoqishadi, yana otib yuboradi. Elektr tarmoqlariga murojaat qildik. Bu bizning ishimiz emas, ‘JEK’ning ishi, deyishdi. ‘JEK’dagilar kelib ulashsa, yana otib yuboryapti. Shu uydagi 48 ta xonadan elektrsiz o‘tiribdi”, – deydi fuqaro Dilfuza Mirzaahmedova.

Chilonzor tumani elektr tarmoqlari korxonasi rahbari Bahodir Xolboyevning izohlashicha, hozirgi sharoitda elektr energiyasiga talab oshishi oqibatida kuchlanish yuzaga kelib, qisqa tutashuv yuz bergan.

Xolboyevning so‘zlariga ko‘ra, murojaat qilingan zahoti vaziyat o‘rganilgan. Muammo yer ostidan o‘tgan simlarda ekanini aniqlab, aholi chiroqsiz qolib ketmasligi uchun vaqtincha sim bilan ulab berilgan. Ko‘p o‘tmay, bu sim ham erib ketgan. Besh marta ulangan, ammo baribir oradan biroz o‘tib, yana shu holat takrorlanavergan.

“Orada qayerdadir sim erigan va yopishib qolgan. Buning uchun butun uydagi elektr bilan bog‘liq simlarni tekshirib chiqish kerak. Shu nuqta topilgach muammoni hal qilish mumkin. Bu bitta bizga bog‘liq holat emas. Biz shu xonadongacha bo‘lgan joyda tegishli yordamni beramiz, lekin uy ichida xizmat ko‘rsatishga haqqimiz yo‘q. Muammo esa uy ichida bo‘lishi mumkin.

Bu uyga xususiy uy-joy mulkdorlari shirkati javob berishi, fuqarolar ulardan talab qilishlari lozim. Shirkatlar ham o‘z xizmat vazifalariga sovuqqonlik bilan qaramasdan, aholiga qulaylik yaratishda yordam berishsa, yaxshi bo‘lardi.

Bu muammoni o‘z vaqtida bartaraf qilish kerak. Biz ulab beryapmiz, ammo yong‘in chiqishi ham mumkin. Chunki shirkatning energetikaga mas’ul xodimi buni qabul qilishga tayyor emas”, – deydi Chilonzor tuman “Hududiy elektr tarmoqlari korxonasi” rahbari.

Chilonzor tumani hokimi Sarvar Mahametov sayyor qabulda muammo shu kuniyoq hal qilinishi lozimligini aytgan.

Murojaatchi fuqaro Dilfuza Mirzaahmedovaning 26-noyabr kuni ma’lum qilishicha, 24-noyabrdagi sayyor qabuldan so‘ng shu kuni xonadonlarga vaqtinchalik elektr liniyasi tortib berilgan.

Avvalroq elektr energiyasidan qarzdorligi ko‘p viloyatlar uchligi e’lon qilingan edi. Unga ko‘ra, viloyatlar ichida eng katta qarzdor “lider” hudud bu — Samarqand.

Ma’lumot uchun, so‘nggi paytlarda O‘zbekistonda havo haroratining keskin sovishi ortidan elektr va gaz ta’minotida jiddiy muammolar yuzaga kelmoqda. Xususan, To‘raqo‘rg‘on, Taxiatosh va Tallimarjon issiqlik energiya stansiyalarida ketma-ket avariyalar yuz bergani ma’lum bo‘ldi. Farg‘ona viloyatida elektr energiyasi ta’minotida 28 soatgacha uzilishlar kuzatilmoqda, xususan, viloyatning O‘zbekiston tumanida o‘n minglab aholi bir sutkadan ortiq elektr ta’minotisiz qolib ketdi. Kattaqo‘rg‘onda elektrsiz qolgan issiqxona bir kechada 35 ming dollar zarar ko‘rdi, qashqadaryolik tadbirkor uch kun elektrsiz qolgani sabab olti mingta tovug‘idan ayrildi.