Senat tomonidan Farg‘ona vodiysida energiya muammosini o‘rganish maqsadida ishchi guruh tuzildi
O‘zbekiston Oliy Majlis Senati tomonidan Farg‘ona vodiysi viloyatlarida tabiiy va suyultirilgan gaz, ko‘mir hamda elektr energiyasi bilan ta’minlash holatini o‘rganish bo‘yicha ishchi guruhi tuzildi, deya xabar qilmoqda Senat raisi Tanzila Norboyevaning ijtimoiy tarmoqdagi sahifasida.
Ma’lum qilinishicha, ishchi guruh viloyatlardagi Monopoliyaga qarshi kurashish boshqarmalarida soat 14:00 dan 18:00 ga qadar quyidagi jadvalga asosan qabulni tashkil etadi:
- Namangan shahrida 27-noyabr kuni;
- Andijon shahrida 28-noyabr kuni;
- Farg‘ona shahrida 29-noyabr kuni.
Mavzuga doir: Monopoliyaga qarshi kurashish qo‘mitasi Toshkent viloyatining elektr ta’minoti korxonalarini sudga berdi
Xususan, To‘raqo‘rg‘on, Taxiatosh va Tallimarjon issiqlik energiya stansiyalarida ketma-ket avariyalar yuz bergani ma’lum bo‘ldi. Farg‘ona viloyatida elektr energiyasi ta’minotida 28 soatgacha uzilishlar kuzatilmoqda, xususan, viloyatning O‘zbekiston tumanida o‘n minglab aholi bir sutkadan ortiq elektr ta’minotisiz qolib ketdi. Kattaqo‘rg‘onda elektrsiz qolgan issiqxona bir kechada 35 ming dollar zarar ko‘rdi, qashqadaryolik tadbirkor uch kun elektrsiz qolgani sabab olti mingta tovug‘idan ayrildi.
Shu bilan birga, Namanganda 55 mingga yaqin xonadonda tabiiy gaz ta’minotida uzilishlar sodir bo‘layotgani ma’lum qilindi.
