Farg‘ona viloyatining O‘zbekiston tumanida o‘n minglab aholi 30 soatdan buyon elektr ta’minotisiz qolmoqda, deya xabar bermoqda “Daryo” muxbiri. Holatdan mahalliy jamoatchilik vakillari ham shikoyat qilgan.
Xususan, bloger Isroil Tillaboyevning yozishicha, transformator kuyib ketgani sabab “200 mingdan ziyod aholiga bir sutkadan buyon elektr berilmayapti”. Uning qo‘shimcha qilishicha, “kecha kechqurun 200 dan ziyod aholi tuman elektr tarmoqlariga kelib janjal ko‘targan”.
“Hokimiyat xodimlari maktab, bog‘chalarni qishga tayyorgarligini tekshiravermay, elektr tarmoqlari, gaz idoralarining ham tayyorgarligini tekshirsa bo‘lmaydimi? Xalqning kundan kunga sabrini maksimal darajada sinab, biror kor-hol boshlanishini kutmoqdami bu rahbarlar? O‘zi kunda tuzuk yonmagan tokni endi tikkalay sutkalab bermaslikni odat qilishga o‘tdilaringmi?”, —deb e’tiroz bildirgan bloger.
“Daryo” muxbirining aniqlik kiritishicha, 22-noyabr kuni soat 8:10 da “tabiiy gaz bosimining pastligi oqibatida elektr energiyasi iste’molining ortib ketishi” sababli “Yaypan” nimstansiyasidagi 16 ming kVA quvvatga ega transformator punkti favqulodda avariyaviy o‘chgan. Oqibatda O‘zbekiston tumanidagi to‘qqizta — “Jangir”, “Qushqo‘noq”, “Buzuqo‘rg‘on”, “Tagob”, “Islom”, “Oxta”, “Begobod”, “Otaliq” va “O‘rmonobod” havo tarmoqlari elektr energiyasi ta’minotidan uzilgan va beshta mahalla fuqarolar yig‘inidagi qariyb 100 ming aholi elektr ta’minotisiz qolgan.
O‘zbekiston tumani hokimligi axborot xizmati rahbari Dilshodjon Jabborovning “Daryo” muxbiriga ma’lum qilishicha, tuman hokimi Qahramonjon Jo‘rayev boshchiligidagi mas’ullar 22-noyabrdan buyon elektr tarmoqlari korxonasida bo‘lib, vaziyatni nazorat qilmoqda. Zudlik bilan maxsus brigadalar tashkil etilib, avariya holatini bartaraf etish choralari ko‘rilgan. Natijada 22-noyabr kuni soat 19:00 da elektr ta’minoti qisman tiklangan.
Ayni vaqtda viloyat “Hududiy elektr tarmoqlari” korxonasi mutaxassislari tomonidan transformator punktida ta’mirlash ishlari davom ettirilmoqda. Tumanning chiroqsiz qolgan mahallalarida elektr ta’minoti qachon to‘liq tiklanishi ma’lum qilinmagan.
O‘zbekiston tumani elektr tarmoqlari korxonasi mutaxassisining “Daryo” muxbiriga bergan ma’lumotiga ko‘ra, ta’mirlash ishlari yakunlangunicha aholiga qo‘shni — Furqat tumanidan elektr olib beriladi. Bundan tashqari, tumandagi sanoat korxonalari uchun mo‘ljallangan tarmoqlardagi elektr energiyasi ham vaqtincha aholiga yo‘naltiriladi.
Avvalroq Farg‘ona prokuraturasi viloyatning ayrim hududlarida elektr energiyasi yetkazib berishda 3 soatdan 28 soatgacha uzilishlar kuzatilayotganini aniqlagani haqida xabar berilgan edi. Prokuratura ma’lumotlariga ko‘ra, O‘zbekiston tumanida 4 soatgacha, Furqat tumanida esa 9 soatgacha uzilishlar kuzatilgan.
Qayd etish joiz, so‘nggi bir haftada O‘zbekistonda havo haroratining keskin sovishi ortidan elektr va gaz ta’minotida jiddiy muammolar yuzaga kelmoqda. Xususan, To‘raqo‘rg‘on, Taxiatosh va Tallimarjon issiqlik energiya stansiyalarida ketma-ket avariyalar yuz bergani ma’lum bo‘ldi, shuningdek, Turkmanistondan elektr energiyasi yetkazib berishda ham uzilishlar bo‘lgan.
Izoh (0)