“Xizmat mashinasidan shaxsiy ishlarida foydalanish odatiy hol bo‘lib qolgan”. Akmal Burhonov amaldorlarning xizmat avtomobillaridan foydalanishini tanqid qildi

Korrupsiyaga qarshi kurashish agentligi direktori Akmal Burhonov “Sevimli” telekanalida efirga uzatiladigan “Zamon” ko‘rsatuviga bergan intervyusida O‘zbekistondagi amaldorlar xizmat avtomashinasidan o‘z ehtiyojlari yo‘lida foydalanish holatlari ko‘p kuzatilishi va bu kabi holatlar endilikda tartibga solinishini ma’lum qildi.

“Xizmat avtotransportlaridan foydalanishda ham aniq cheklovlar qo‘yilmoqda. Afsuski, ko‘p holatlarda shaxsiy, oilaviy ishlarida, farzandini maktabga olib borish yoki bozordan xaridlarni amalga oshirishda xizmat avtotransportidan foydalanish oddiy hol bo‘lib qolgan. ‘Bu mening avtotransportim’ degan qanaqadir tushuncha paydo bo‘lgan”, — deydi Akmal Burhonov.

Uning ta’kidlashicha, qaror bilan bu kabi holatlarni tartibga solish rejalashtirilgan.

Shu bilan birga, Korrupsiyaga qarshi kurashish agentligi direktorining o‘zi hukumat tomonidan berilgan navbatchi avtomobildan foydalanishini, agentlik rahbari uchun maxsus avtomashina sotib olinmaganini ma’lum qilgan.

“Hukumat foydalanish uchun bizga ijaraga mashina taqdim etilgan, biz shunday foydalanamiz”, — deydi Burhonov.

Avvalroq Akmal Burhonov mansabdor shaxslar pandemiya sharoitida davlat mablag‘larining samarali sarflanishi naqadar muhim ekanligini to‘la anglab yetmayotgani, qimmat narxlardagi xizmat avtotransportlari xarid qilinayotganiga munosabat ham bildirgandi. Shuningdek, Prezidentning yangi qaroriga ko‘ra, tuman hokimlariga narxi 267,5 million so‘mdan yuqori xizmat avtomobili sotib olish taqiqlanishi mumkinligi ma’lum qilingan edi.