Toshkentda issiqlik ta’minoti tizimidagi muammolarni bartaraf etish uchun 772,2 mln dollar kerakligi ma’lum qilindi

AOKA huzurida “Toshissiqquvvati” davlat unitar korxonasi direktori o‘rinbosari Aziz Sayfullayev ishtirokida brifing bo‘lib o‘tdi. Unda kuz–qish mavsumida aholini issiqlik energiyasi bilan ta’minlash bo‘yicha yuzaga kelayotgan muammolar, ularni bartaraf etish bo‘yicha ko‘rilayotgan tezkor choralar haqida ma’lumot berildi.

“Aholi hamda ijtimoiy soha obyektlari uchun qulay shart-sharoit yaratishda issiqlik va issiq suv ta’minoti bo‘yicha uzluksiz va sifatli xizmat ko‘rsatish eng muhim omillardan biri sanaladi”, — dedi Aziz Sayfullayev.

Qayd etilishicha, “Toshissiqquvvati” tomonidan poytaxtdagi 12 801 ta bino-inshootlarga issiqlik energiyasi yetkazilmoqda, jumladan:

• 9200 ta ko‘p kvartirali uylarga;
• 524 ta davolash muassasalariga;
• 498 ta maktablarga;
• 635 ta bolalar bog‘chasiga;
• 514 ta oliy va o‘rta maxsus ta’lim muassasalariga;
• 1430 ta boshqa obyektlarga issiqlik energiyasi yetkazib berilmoqda.

Ta’kidlanishicha, hozirgi vaqtda barcha issiqlik tarmoqlarining 72 foizi (17 yildan ortiq) foydalanish muddatini o‘tab bo‘lgan, ya’ni 1940 kilometr uzatuvchi quvurlar (970 kilometr kanal) almashtirilishi ko‘zda tutilmoqda.

Toshkent shahri issiqlik ta’minoti tizimini zamonaviy energotejamkor texnologiyalar asosida rivojlantirish maqsadida O‘zbekiston prezidentining 2019 yil 2-dekabrdagi “Toshkent shahrining issiqlik ta’minoti tizimini yana-da takomillashtirish chora-tadbirlari to‘g‘risida”gi PQ-4542-sonli qarori imzolangan.

Qaror bilan 2020–2022-yillarda Toshkent shahri issiqlik ta’minoti tizimi samaradorligining asosiy maqsadli indikatorlari tasdiqlanib, 2023-yilgacha 358,5 kilometr quvurlarni almashtirilishi (qayta yotqizish) ko‘zda tutilgan. Bundan 2021 yilda — 157,3 kilometr quvurlar, 2022-yilda — 201,2 kilometr quvurlar almashtiriladi.

“Toshkentdagi quvurlarning 72 foizi avariya holatida”

“Kun.uz”ning “Toshissiqquvvati” xodimi Ikrom Isakovga tayanib ma’lum qilinishicha, ayni vaqtda Toshkent shahridagi issiqlik uzatish quvurlarining 70 foizdan ortig‘i – jami 1940 kilometr uzunlikdagi quvurlar avariya holatida. Mutasaddi aholiga issiqlik yetkazib beruvchi quvurlarni yangilash masalasiga to‘xtalgan.

“Toshkent shahrida jami 2 900 kilometr quvur bor. Undan 72 foizi, ya’ni 1940 kilometrlik qismining muddati o‘tgan. Muddati o‘tdi deb 17 yildan ortiq vaqt davomida ishlatilgan quvurlarga aytiladi. Ularni almashtirish lozim. Chunki bundan keyingi davrda avariya xavfi katta bo‘ladi.

Hurmatli prezidentimiz shuni inobatga olib 2019-yil 2-dekabrda “Toshkent shahrining issiqlik ta’minoti tizimini yana-da takomillashtirish chora-tadbirlari to‘g‘risida”gi qarorini imzolagandi. Shu qaror asosida 2021–2022-yillarda Toshkent shahri bo‘yicha 351 kilometr quvurni almashtirishimiz kerak.

Hozirda ishlab turgan 20, 30 yillik quvurlar ham bor. Muddati o‘tib ketishiga birinchi va asosiy sabab – moliyaviy masala. Ularni almashtirishga mablag‘ kerak. Tashkilotimiz moliyaviy jihatdan o‘zini-o‘zi ta’minlaydi. Shu paytgacha mablag‘imiz miqdoriga qarab quvurlarni almashtirganmiz. Davlat ham bir qismini moliyalashtirgan, lekin bu juda kam miqdorda bo‘lgan.

Hozirda prezident qarori bilan davlatning moliyaviy qo‘llab-quvvatlashi natijasida 2022-yilgacha quvurlarni almashtirish ishlarini olib borishni rejalashtirganmiz. Kelgusi ikki yilda 351 kilometr quvurni yangisiga almashtirish juda ham katta natija bo‘ladi. Bu 2021-yilda 150 kilometr, 2022-yilda 201 kilometr degani”, – deydi korxona vakili.

Ma’lum qilinishicha, ayni paytda “Toshissiqquvvati” tomonidan poytaxtdagi 12 ming 801 ta bino va inshootlarga issiqlik energiyasi yetkazib berilmoqda.

Ma’lumot uchun, Toshkentda isitish mavsumi 15-oktabrdan boshlangan.