24 ноябрь куни Тошкент шаҳар Чилонзор тумани сектор раҳбарлари иштирокида ўтказилган сайёр қабулда туманнинг «Шароф» маҳалласи фуқаролари ўзлари яшаётган кўп қаватли уйдаги 48 та хонадонда 5 кундан буён электр энергияси йўқлигини маълум қилди, деб хабар беради «Kun.uz».
«Маҳалламиздаги бир нечта уй эксперимент учун танлаб олинган: газ уланмаган, ҳамма нарса электрда. Бу уйларда электрсиз ҳаёт тўхтайди – на чой ича оласиз, на овқат ея оласиз... Бугун бешинчи кун, светсиз ўтирибмиз. Ёқишади, отиб юборади; ёқишади, яна отиб юборади. Электр тармоқларига мурожаат қилдик. Бу бизнинг ишимиз эмас, ‘ЖЕКънинг иши, дейишди. ‘ЖЕКъдагилар келиб улашса, яна отиб юборяпти. Шу уйдаги 48 та хонадан электрсиз ўтирибди», – дейди фуқаро Дилфуза Мирзааҳмедова.
Чилонзор тумани электр тармоқлари корхонаси раҳбари Баҳодир Холбоевнинг изоҳлашича, ҳозирги шароитда электр энергиясига талаб ошиши оқибатида кучланиш юзага келиб, қисқа туташув юз берган.
Холбоевнинг сўзларига кўра, мурожаат қилинган заҳоти вазият ўрганилган. Муаммо ер остидан ўтган симларда эканини аниқлаб, аҳоли чироқсиз қолиб кетмаслиги учун вақтинча сим билан улаб берилган. Кўп ўтмай, бу сим ҳам эриб кетган. Беш марта уланган, аммо барибир орадан бироз ўтиб, яна шу ҳолат такрорланаверган.
«Орада қаердадир сим эриган ва ёпишиб қолган. Бунинг учун бутун уйдаги электр билан боғлиқ симларни текшириб чиқиш керак. Шу нуқта топилгач муаммони ҳал қилиш мумкин. Бу битта бизга боғлиқ ҳолат эмас. Биз шу хонадонгача бўлган жойда тегишли ёрдамни берамиз, лекин уй ичида хизмат кўрсатишга ҳаққимиз йўқ. Муаммо эса уй ичида бўлиши мумкин.
Бу уйга хусусий уй-жой мулкдорлари ширкати жавоб бериши, фуқаролар улардан талаб қилишлари лозим. Ширкатлар ҳам ўз хизмат вазифаларига совуққонлик билан қарамасдан, аҳолига қулайлик яратишда ёрдам беришса, яхши бўларди.
Бу муаммони ўз вақтида бартараф қилиш керак. Биз улаб беряпмиз, аммо ёнғин чиқиши ҳам мумкин. Чунки ширкатнинг энергетикага масъул ходими буни қабул қилишга тайёр эмас», – дейди Чилонзор туман «Ҳудудий электр тармоқлари корхонаси» раҳбари.
Чилонзор тумани ҳокими Сарвар Маҳаметов сайёр қабулда муаммо шу куниёқ ҳал қилиниши лозимлигини айтган.
Мурожаатчи фуқаро Дилфуза Мирзааҳмедованинг 26 ноябрь куни маълум қилишича, 24 ноябрдаги сайёр қабулдан сўнг шу куни хонадонларга вақтинчалик электр линияси тортиб берилган.
Аввалроқ электр энергиясидан қарздорлиги кўп вилоятлар учлиги эълон қилинган эди. Унга кўра, вилоятлар ичида энг катта қарздор «лидер» ҳудуд бу — Самарқанд.
Мавзуга доир:
Изоҳ (0)