Surxondaryoda elektr ta’minotidagi uzilishlar yuzasidan izoh berildi

Surxondaryo hududiy elektr tarmoqlari korxonasi viloyatdagi elektr ta’minotida kuzatilgan uzilishlar yuzasidan izoh berdi. Bu haqda viloyat hokimligining axborot xizmati xabar berdi.

Surxondaryo hududiy elektr tarmoqlari korxonasi matbuot kotibi Azimbek Samadov viloyat hududida sodir bo‘lgan elektr ta’minotidagi uzilishlar bo‘yicha quyidagilarni ma’lum qilgan.

“Uzilishlar va energiya tizimidagi quvvat tanqisligiga Talimarjon va To‘raqo‘rg‘on issiqlik elektr stansiyalari hamda Turkmaniston bilan bog‘lovchi 500 kilovoltli tarmoqda sodir bo‘lgan nosozliklar natijasida Magistral elektr ta’minoti korxonasi stansiyalarida yuklamani kamaytirishning maxsus avtomatikasi ishlab ketgan. Oqibatda viloyatdagi elektr energiyasining quvvati 500 megavattdan 370-400 megavattga tushishi oqibatida shahar va tumanlarda uzilishlar yuzaga kelgan. Holatlarni mutaxassislar tomonidan bartaraf etish choralari ko‘rilmoqda, yuzaga kelayotgan noqulayliklar uchun uzr so‘raymiz”, – degan Azimbek Samadov.

20-noyabrda Energetika vazirligi matbuot xizmati iste’molchilar ehtiyojini ta’minlash uchun Taxiatosh IESning quvvati 280 megavatt bo‘lgan 1-energoblogi hamda Talimarjon IESning quvvati 450 megavatt bo‘lgan 2-energoblogi ham to‘liq quvvatda ishlashi ta’minlanganini ma’lum qilgan.

Avval Farg‘ona viloyatida elektr energiyasi ta’minotida 28 soatgacha uzilishlar kuzatilayotgani, Taxiatosh IES sovuq kunlarda qariyb bir yarim kun ishlamay qolgani, Kelesdagi tug‘ruqxona elektr ta’minotida uzilish kuzatildi. Holat yuzasidan izoh berilgani haqida xabar qilingan.

Energetika vazirligi O‘zbekistonda elektr energiyasi ta’minotidagi uzilishlarning asosiy sababi havoning sovib ketishi natijasida elektr energiyasi iste’molining keskin ortishi ekanligini ma’lum qilgan. Keyinchalik, Monopoliyaga qarshi kurashish qo‘mitasi so‘nggi paytlarda gaz va elektr muammolari yuz berayotgani bo‘yicha qo‘mita va uning huzuridagi agentlikka murojaat qilishni so‘ragan.