Taxiatosh IES avariya holatida o‘chib, 20-noyabr kuni Qoraqalpog‘istonning barcha shahar va tumanlarida soat 11:00 dan boshlab, turli vaqt oralig‘ida elektr energiyasi ta’minotida vaqtinchalik uzilishlar yuz bergani ma’lum bo‘ldi.
Foto: Energetika vazirligi matbuot xizmati.
“Kun.uz”ning xabar berishicha, Taxiatosh IESda texnik nosozlik holati kuzatilgan. 18-noyabr kuni 23:22 vaqti bilan 1-bug‘-gaz qurilmasidagi texnik nosozlik tufayli IES ishdan to‘xtatilgan. 20-noyabr kuni 16:35 vaqti bilan nuqsonlar bartaraf qilinib, qurilma ishga tushirilgan.
Taxiatosh IES mas’ul xodimining ma’lum qilishicha, hozirda stansiya 250 mV quvvat bilan ishlamoqda.
Bundan avval Namangan viloyatida joylashgan To‘raqo‘rg‘on IESning ikkita energoblogi 20-noyabr kuni avariyaviy to‘xtashi natijasida mazkur stansiya orqali energotizimga yetkazib berilayotgan quvvat 600 megavattga kamaygani haqida xabar berilgandi. Buning oqibatida Farg‘ona vodiysi viloyatlari, Toshkent shahri, Samarqand, Buxoro va Qashqadaryo viloyatlarida elektr energiyasi ta’minotida avtomatik ravishda cheklovlar kiritilgandi. Keyinchalik Energetika vazirligi matbuot xizmati yuzaga kelgan nosozlik bartaraf etilgani, stansiya to‘liq quvvatda ishlayotganini ma’lum qildi.
