Qozog‘istonda koronavirusga qarshi Rossiya vaksinasi ishlab chiqarilish yo‘lga qo‘yiladi. Bu haqda Qozog‘iston prezidenti Qosim-Jo‘mart To‘qayev aytib o‘tdi, deb xabar bermoqda “RBK”.
“Men Rossiya prezidenti bilan Rossiya vaksinalarini ishlab chiqaradigan zavod qurish to‘g‘risida kelishuvga erishdim. Hukumat allaqachon ushbu zarur loyihaga sarmoya jalb qilish bo‘yicha muzokaralarni boshladi”, — dedi To‘qayev.
Xabar berilishicha, o‘tgan haftada Qozog‘iston prezidenti Rossiya prezidenti Vladimir Putin bilan telefon orqali muzokara o‘tkazgan. Ular pandemiyaga qarshi kurashda, shu jumladan, “Qozog‘istonda vaksinalarni birgalikda ishlab chiqarishni tashkil etish rejalarini” faollashtirishga kelishib olgan.
Rossiyada koronavirusga qarshi ikkita vaksina ro‘yxatdan o‘tkazilgan — Gamaleya markazi tomonidan yaratilgan “Sputnik V” vaksinasi va Novosibirskdagi “Vektor” markazi tomonidan yaratilgan “EpiVakKorona” vaksinasi. Shuningdek, Chumakov nomidagi markaz tomonidan yana bir vaksina ishlab chiqilmoqda.
“Sputnik V” sinovlarning uchinchi, so‘nggi bosqichida. Vaksina 40 ming ko‘ngillida sinovdan o‘tkazilmoqda, ularning to‘rtdan bir qismi platsebo olgan.
Belarus va Meksika ham Rossiya bilan ushbu vaksinani sinovdan o‘tkazishga kelishib olgan, 2021-yil boshidan boshlab dori Venesuelaga yetkazib beriladi. Shu bilan birga, AQSh Rossiya vaksinasiga ishonchsizlik bilan qaradi va uni ishlatishdan bosh tortdi.
Eslatib o‘tamiz, “Sputnik V” vaksinasi yaratuvchilari uning samaradorligini 92 foiz deb baholadi. Bu esa samaradorligi 90 foizga baholangan AQShning Pfizer kompaniyasi tomonidan yaratilgan vaksina ko‘rsatkichidan yuqori.
Avvalroq Rossiyaning Kemerovo viloyatidagi shifokorlardan biri COVID-19’ga qarshi birinchi “Sputnik V” vaksinasi bilan amalga oshirilgan emlashdan so‘ng koronavirusga chalingani, shuningdek, Oltoy o‘lkasida “Sputnik V” vaksinasi bilan emlangan uch shifokor ham koronavirusga chalingani haqida xabarlar berilgandi.
Avvalroq AQShning Moderna kompaniyasi uning koronavirusga qarshi vaksinasi sinovlarning uchinchi bosqichida 94,5 foiz samaradorlik ko‘rsatganini e’lon qilgandi. Pfizer va BioNTech kompaniyalari ular tomonidan yaratilgan koronavirusga qarshi vaksinaning samaradorligi klinik sinovlarning uchinchi bosqichida 90 foizni tashkil etganini ma’lum qilgandi.
Izoh (0)