Fransiya sog‘liqni saqlash vaziri Olivye Veran qaytadan joriy qilingan karantin sharofati bilan mamlakatda koronavirusning ikkinchi to‘lqini avj nuqtasidan o‘tib olishga muvaffaq bo‘lganini ma’lum qildi. 10 kun ichida kasallanish bilan bog‘liq yangi holatlar ancha kamaygan, deb yozadi “Korrespondent.net”.
“Biz epidemiya ustidan nazoratni qayta tikladik, bu — yaxshi yangilik”, — dedi vazir.
Fransiya 30-oktabrda qaytadan karantin e’lon qilgan edi. U 1-dekabrgacha davom etishi kerak. Aynan shu jiddiy cheklovlar koronavirus tarqalishini sekinlashtirdi, dedi Olivye Veran.
“Bu bizga epidemiyaning avj nuqtasidan o‘tdik, deb hisoblash imkonini beradi”, — deya ta’kidladi SSV rahbari, ammo u jamoaviy harakatlarni susaytirishga hali erta ekanligini qo‘shib qo‘ydi.
Fransiyada o‘tgan bir kecha-kunduzda 27 228 ta kasallanish holati qayd etildi. 302 kishi vafot etdi. Noyabr boshida mamlakatda eng yuqori ko‘rsatkich qayd etilgan — bir kunda 62 ming kishi koronavirusga chalingan edi.
Oktabr oxirida karantin haqida mamlakat prezidenti Emmanuel Makron e’lon qilgan edi. U ommaviy tadbirlar bekor qilinishi, ko‘p sonli odamlar to‘planadigan joylar, xususan, bar va restoranlar yopilishi, buning imkoniyati bo‘lgan barcha korxonalarda masofadan ishlash formati joriy etilishini aytgandi. Shundan so‘ng 30-oktabrdan 1-dekabrgacha umumiy karantin joriy qilindi. Ulgurji savdo muassasalari, maktablar va maktabgacha ta’lim muassasalari, maktabdan tashqari mashg‘ulotlar o‘tkazuvchi muassasalar, mehmonxonalar, barcha sog‘liqni saqlash muassasalari, jamoat transporti o‘z ishini davom ettiradi.
6-noyabrdan esa Parijda COVID-19 tufayli tunda oziq-ovqat yetkazib berish va spirtli ichimliklar sotib olish taqiqlandi.
Izoh (0)