Қозоғистонда коронавирусга қарши Россия вакцинасини ишлаб чиқарувчи завод қурилади

Қозоғистонда коронавирусга қарши Россия вакцинаси ишлаб чиқарилиш йўлга қўйилади. Бу ҳақда Қозоғистон президенти Қосим-Жўмарт Тўқаев айтиб ўтди, деб хабар бермоқда «РБК».

«Мен Россия президенти билан Россия вакциналарини ишлаб чиқарадиган завод қуриш тўғрисида келишувга эришдим. Ҳукумат аллақачон ушбу зарур лойиҳага сармоя жалб қилиш бўйича музокараларни бошлади», — деди Тўқаев.

Хабар берилишича, ўтган ҳафтада Қозоғистон президенти Россия президенти Владимир Путин билан телефон орқали музокара ўтказган. Улар пандемияга қарши курашда, шу жумладан, «Қозоғистонда вакциналарни биргаликда ишлаб чиқаришни ташкил этиш режаларини» фаоллаштиришга келишиб олган.

Россияда коронавирусга қарши иккита вакцина рўйхатдан ўтказилган — Гамалея маркази томонидан яратилган «Спутник V» вакцинаси ва Новосибирскдаги «Вектор» маркази томонидан яратилган «ЭпиВакКорона» вакцинаси. Шунингдек, Чумаков номидаги марказ томонидан яна бир вакцина ишлаб чиқилмоқда.

«Спутник V» синовларнинг учинчи, сўнгги босқичида. Вакцина 40 минг кўнгиллида синовдан ўтказилмоқда, уларнинг тўртдан бир қисми плацебо олган.

Беларусь ва Мексика ҳам Россия билан ушбу вакцинани синовдан ўтказишга келишиб олган, 2021 йил бошидан бошлаб дори Венесуэлага етказиб берилади. Шу билан бирга, АҚШ Россия вакцинасига ишончсизлик билан қаради ва уни ишлатишдан бош тортди.

Эслатиб ўтамиз, «Спутник V» вакцинаси яратувчилари унинг самарадорлигини 92 фоиз деб баҳолади. Бу эса самарадорлиги 90 фоизга баҳоланган АҚШнинг Pfizer компанияси томонидан яратилган вакцина кўрсаткичидан юқори.

Аввалроқ Россиянинг Кемерово вилоятидаги шифокорлардан бири COVID-19’га қарши биринчи «Спутник V» вакцинаси билан амалга оширилган эмлашдан сўнг коронавирусга чалингани, шунингдек, Олтой ўлкасида «Спутник V» вакцинаси билан эмланган уч шифокор ҳам коронавирусга чалингани ҳақида хабарлар берилганди.

Аввалроқ АҚШнинг Moderna компанияси унинг коронавирусга қарши вакцинаси синовларнинг учинчи босқичида 94,5 фоиз самарадорлик кўрсатганини эълон қилганди. Pfizer ва BioNTech компаниялари улар томонидан яратилган коронавирусга қарши вакцинанинг самарадорлиги клиник синовларнинг учинчи босқичида 90 фоизни ташкил этганини маълум қилганди.