Rossiyalik immunolog: “Hamma odamlar bir vaqtda o‘z uylariga qamab qo‘yilsa, epidemiya ikki haftada tugaydi”

Rossiyalik shifokor-immunolog Vladimir Bolibok COVID-19 pandemiyasini to‘xtatishning samarali usulini aytdi, deb xabar bermoqda “RBK”.

Epidemiologiya bo‘yicha har qanday darslikda yozilgan: agar siz infeksiyaga chalinganlarni ajratib, keskin karantinga o‘tqizsangiz, epidemiya tugaydi. Chunki virus organizmda abadiy yashamaydi. Yoki organizm virus bilan birga nobud bo‘ladi, yoki virus o‘lib, organizm sog‘ayadi. Shu bilan virusning tarqalish zanjiri to‘xtaydi. Agar siz bir vaqtning o‘zida barcha odamlarni hech kim hech qayerga ketmasligi uchun o‘zlarining uylariga qamab qo‘ysangiz, epidemiya 2 hafta ichida tugaydi”, — degan Vladimir Bolibok Sputnik radiosiga bergan interyusida.

Immunologning fikricha, aynan shu sxema bo‘yicha qat’iy ish yuritgani uchun Xitoy, Tayvan, Janubiy Koreya va Vyetnam kabi mamlakatlar koronavirusni to‘xtata oldi.

Jons Hopkins universiteti ma’lumotlariga ko‘ra, dunyoda koronavirus bilan kasallanganlar soni 54 milliondan oshdi. JSST ma’lumotlariga ko‘ra, 15-noyabr kuni koronavirus aniqlanganlar soni 657 mingtadan oshdi. Bu so‘nggi hafta ichidagi navbatdagi rekord ko‘rsatkichdir.

Shu sababli ko‘plab mamlakatlarda karantin choralari kuchaytirildi. Xususan, Avstriyada 17-noyabrdan to‘liq lokdaun, Eronda 21-noyabrdan qat’iy cheklov choralari joriy qilinadi.  Koronavirus sabab Niderlandiya, Fransiya, Shveysariya va Gruziyada ham karantin choralari kuchaytirilgan.