Koronavirus pandemiyasi sababli joriy etilgan cheklovlar oqibatida Abxaziyada qolib ketgan va vatanga qaytish istagida bo‘lgan O‘zbekiston fuqarolarining yangi ro‘yxati shakllantirilmoqda. Bu haqda Oliy Majlis Qonunchilik palatasi deputatlari Qodir Jo‘rayev, Feruza Nigmatova va Muqaddas Tirkashevaning O‘zAda e’lon qilingan qo‘shma maqolasida ma’lum qilingan.
Maqolada aytilishicha, sentabr oyi oxirida Oliy Majlis Qonunchilik palatasining bir guruh deputatlari Abxaziyada yuzlab o‘zbeklar pandemiya tufayli himoyasiz, nochor ahvolda qolganini bayon qilib, ularni Vatanga qaytarishda amaliy ko‘mak berishni so‘rab Respublika maxsus komissiyasiga deputatlik so‘rovi yuborgan.
Ushbu murojaat asosida komissiya tomonidan Tashqi ishlar vazirligi va O‘zbekistonning Rossiyadagi diplomatik vakolatxonasi orqali Rossiya va Abxaziyadagi mutasaddi idoralar bilan muzokaralar olib borilgan va fuqarolarni O‘zbekistonga qaytarish bo‘yicha muhim kelishuvga erishilgan.
Ma’lum qilinishicha, birinchi bosqichda, ya’ni 2020-yil 9-oktabrda 19 nafar fuqaro vatanga qaytarildi. 28-oktabr va 1-noyabr kunlari Uzbekistan Airways kompaniyasi tomonidan tashkil etilgan charter reyslarda yana 385 kishi O’zbekistonga olib kelindi. Deputatlarning bildirishicha, hozirgi kunda Abxaziyadan vatanga qaytish istagida bo‘lgan fuqarolarning yangi ro‘yxati shakllantirilmoqda.
Mavzuga doir: Karantin joriy etilgandan buyon xorijda qolib ketgan 400 mingdan ortiq vatandosh O‘zbekistonga qaytarildi
Avvalroq Rossiya orqali Abxaziyaga ishlashga borgan, pandemiya tufayli ushbu hududda qolib ketgan o‘zbekistonliklar Tashqi ishlar vazirligining bayonotiga ishonib, 15-oktabrdan boshlab Abxaziya—Rossiya chegarasida to‘plana boshlagani, ularning yuzga yaqini ortga qaytishni istamay, chegara-nazorat punkti atrofida tunayotgani to‘g‘risida xabar berilgan edi.
Tashqi ishlar vazirligining 30-sentabr kungi bayonotida 400 ga yaqin o‘zbekistonliklarning birinchi guruhi oktabr boshida vatanga qaytarilishi aytilgandi. O‘zbekistonning Rostov-Dondagi bosh konsulligi bosh konsuli Rustam Kurganbayev ushbu jarayonning cho‘zilib ketganini charter reyslar bilan olib kelinadiganlar ro‘yxatini tuzishga ko‘p vaqt ketib qolgani, qolaversa, Rossiya Maxsus komissiyasidan O‘zbekiston fuqarolarining Sochi orqali olib chiqib ketilishiga ruxsat olish kechikkani bilan izohlagandi. Keyinroq Kurganbayev pandemiya tufayli Abxaziyada qolib ketgan O‘zbekiston fuqarolarini qaytarish 28-oktabrdan boshlanishini ma’lum qilgan.
Izoh (0)