Davlat xavfsizlik xizmati Chegara qo‘shinlari boshqarma boshlig‘i o‘rinbosari Abdulhamid Abdurahmonov 13-noyabr kuni AOKAda o‘tkazilgan brifingda cheragadan o‘tish bilan bog‘liq aholini qiziqtirgan savollarga javob berdi.
Xususan, maxsus komissiya bayoniga asosan 1-oktabrdan boshlab chegaradan o‘tishga ruxsat berilganiga qaramay, nima uchun ayrimlar chegaradan o‘ta olmayotgani sababini tushuntirdi.
“Davlat chegarasi orqali o‘tkazish bir davlatning emas, balki ikki tomonning ruxsati bilan amalga oshirilishini hisobga olgan holda Tashqi ishlar vazirligi qo‘shni davlatlar bilan bu borada bir qator tadbirlar o‘tkazdi. Tashqi ishlar vazirligi hamkorligida, shuningdek, qo‘shni davlatlar chegara qo‘shinlari bilan kelishgan holda Davlat chegarasidan fuqarolarni o‘tkazish masalasida ba’zi natijalarga erishildi.
Jumladan, joriy yilning 1-sentabridan Qirg‘iziston Respublikasi bilan chegaradagi o‘tkazish punktlari faoliyati tiklandi, 16-oktabr kunidan — Afg‘oniston Islom Respublikasi, 23-oktabr kunidan — Qozog‘iston Respublikasi bilan chegarada ma’lum bir toifadagi fuqarolarning harakatlanishiga ruxsat berildi.
Turkmaniston tomoni epidemiologik vaziyatdan kelib chiqib kiritilgan cheklovlarni o‘zgarishsiz qoldirish fikrini bildirdi. Tojikiston tomoni hozirda ushbu masalani ko‘rib chiqmoqda.
Shuningdek, Respublika maxsus komissiyasining tegishli qaroriga asosan, temiryo‘l va havo transportida muntazam reyslar xorijiy davlatlar bilan kelishgan holda yo‘lga qo‘yilishiga ruxsat berilgan”, — deydi Abdulhamid Abdurahmonov.
Shuningdek, xorijiy davlatlardan kirib kelishi mumkin bo‘lgan virus tashuvchilari borasida qanday choralar ko‘rilayotganini aytib o‘tgan.
“Xorijiy davlatlardagi epidemiologik vaziyatiga qarab ‘qizil’, ‘sariq’ va ‘yashil’ toifalarga bo‘linishini hisobga olib, fuqarolar tegishli sanitar-karantin qoidalariga rioya etgan holda kirib keladilar. Bunda, epidemiologik vaziyat barqaror ‘yashil’ davlatda so‘nggi 14 kun davomida bo‘lgan shaxs, agar unda kasallik belgilari aniqlanmasa, O‘zbekiston Respublikasi hududiga to‘g‘ridan to‘g‘ri kiritiladi.
‘Sariq’ va ‘qizil’ toifaga kiritilgan davlatlardan kirib kelgan fuqaro tasdiqlangan shakldagi majburiyatnoma blankasini to‘ldiradi, o‘z hisobidan ekspress test tekshiruvidan o‘tadi va natijasiga qarab tibbiyot muassasalariga davolanishga yoki uyiga karantinga yuboriladi”, — degan DXX Chegara qo‘shinlari vakili.
Eslatib o‘tamiz, Respublika maxsus komissiyasining qarori bilan 2020-yil 1-oktabrdan mavjud karantin va sanitariya-gigiyena talablariga qat’iy rioya etgan holda O‘zbekistonga aviatsiya, temir yo‘l va avtoyo‘l o‘tkazish punktlari orqali kirib-chiqishga ruxsat berilgan.
Izoh (0)