Tabiiy gazni iste’molchilarga tarqatish bo‘yicha amaldagi qoidalar Vazirlar Mahkamasining 2018-yil 12-yanvarda qabul qilingan 22-sonli qarori bilan tartibga solinadi. Bu haqda Energetika vazirligi xabar berdi.
Ta’kidlanishicha, tabiiy gaz yetkazib berish har yili tasdiqlanadigan parametrlarga – mahalliy hokimiyat organlari bilan birgalikda ishlab chiqilgan balansga muvofiq qat’iy rioya qilingan holda amalga oshiriladi. Energetika vazirligi tomonidan har yili, 1-dekabrga qadar, “O‘zbekneftgaz” AJ, “O‘ztransgaz” AJ va “Hududgazta’minot” AJ lariga kelgusi yil uchun iste’molchilarga tabiiy gaz yetkazib berishning yillik va choraklik hajmlarini (qish davri uchun oyma-oy) yuboriladi.
“Aholi soni ko‘paymoqda, yangi ishlab chiqarish obyektlari, AGTKS va issiqxonalar gaz quvurlariga ulanmoqda. Shunga ko‘ra, hisoblangan gaz aholi va ijtimoiy soha obyektlariga kerakli bosimda yetib bormay, yo‘lda katta hajmda iste’mol qilinadi”, — deyiladi xabarda.
O‘z navbatida, “Hududgazta’minot” AJ mavjud gaz transport tizimlarining texnik imkoniyatlarini hisobga olgan holda iste’molchilarga tabiiy gaz yetkazib berishning yillik va chorak hajmlarini (qish davri uchun oyma-oy) yetkazib beradi. Gaz ta’minoti tashkilotlariga iste’molchilarning murojaatlarini (maishiy iste’molchilar bundan mustasno) ajratilgan hajmlar darajasida qayta ko‘rib chiqish huquqi berilgan.
Ushbu birinchi darajali iste’molchilarni sovuq mavsumda tabiiy gaz bilan uzluksiz ta’minlash uchun korxonalarni zaxira yoqilg‘i turlariga o‘tkazish jadvallari tuziladi va ushbu jadvallar Vazirlar Mahkamasi tomonidan tasdiqlanadi. Tasdiqlangan jadvallar barcha manfaatdor tashkilotlarga yuboriladi.
Ushbu jadvallar tabiiy gaz yetkazib berishning taxmin qilingan (prognoz) hajmlari birinchi darajali iste’molchilarga, ya’ni aholiga va ijtimoiy ahamiyatga ega bo‘lgan obyektlarga uzluksiz gaz yetkazib berishni ta’minlamagan taqdirda kuchga kiradi.
Qarorda jadvallarga kiritilgan iste’molchilar yoqilg‘i ta’minotining kamaytirilmaydigan zaxirasiga ega bo‘lishlari (kamida 3 oy davomida ehtiyojni ta’minlashi) va sovuq tushganda ushbu rejimda ishlashga o‘tishlari shartligi nazarda turilgan.
“Shundan kelib chiqib, bir qator yuridik shaxslar (jumladan, restoran, kafe kabi umumiy ovqatlanish korxonalari) tomonidan shu kunlarda zaxira yoqilg‘ilariga o‘tish bo‘yicha olingan ko‘rsatmalarda kutilmagan narsa yo‘q – ushbu shartlar gaz ta’minoti bilan tuzilgan shartnomalarida aniq ko‘rsatilgan”, — deyiladi xabarda.
Avvalroq Toshkentdagi tadbirkorlar gaz ta’minoti organi xodimlaridan 1-noyabrdan boshlab gaz uzatilishi o‘chirib qo‘yilishi to‘g‘risida ogohlantirish olayotgani to‘g‘risida xabar berilgandi.
Izoh (0)