Коронавирус пандемияси сабабли жорий этилган чекловлар оқибатида Абхазияда қолиб кетган ва ватанга қайтиш истагида бўлган Ўзбекистон фуқароларининг янги рўйхати шакллантирилмоқда. Бу ҳақда Олий Мажлис Қонунчилик палатаси депутатлари Қодир Жўраев, Феруза Нигматова ва Муқаддас Тиркашеванинг ЎзАда эълон қилинган қўшма мақоласида маълум қилинган.
Мақолада айтилишича, сентябрь ойи охирида Олий Мажлис Қонунчилик палатасининг бир гуруҳ депутатлари Абхазияда юзлаб ўзбеклар пандемия туфайли ҳимоясиз, ночор аҳволда қолганини баён қилиб, уларни Ватанга қайтаришда амалий кўмак беришни сўраб Республика махсус комиссиясига депутатлик сўрови юборган.
Ушбу мурожаат асосида комиссия томонидан Ташқи ишлар вазирлиги ва Ўзбекистоннинг Россиядаги дипломатик ваколатхонаси орқали Россия ва Абхазиядаги мутасадди идоралар билан музокаралар олиб борилган ва фуқароларни Ўзбекистонга қайтариш бўйича муҳим келишувга эришилган.
Маълум қилинишича, биринчи босқичда, яъни 2020 йил 9 октябрда 19 нафар фуқаро ватанга қайтарилди. 28 октябрь ва 1 ноябрь кунлари Uzbekistan Airways компанияси томонидан ташкил этилган чартер рейсларда яна 385 киши Ўзбекистонга олиб келинди. Депутатларнинг билдиришича, ҳозирги кунда Абхазиядан ватанга қайтиш истагида бўлган фуқароларнинг янги рўйхати шакллантирилмоқда.
Мавзуга доир: Карантин жорий этилгандан буён хорижда қолиб кетган 400 мингдан ортиқ ватандош Ўзбекистонга қайтарилди
Аввалроқ Россия орқали Абхазияга ишлашга борган, пандемия туфайли ушбу ҳудудда қолиб кетган ўзбекистонликлар Ташқи ишлар вазирлигининг баёнотига ишониб, 15 октябрдан бошлаб Абхазия—Россия чегарасида тўплана бошлагани, уларнинг юзга яқини ортга қайтишни истамай, чегара-назорат пункти атрофида тунаётгани тўғрисида хабар берилган эди.
Ташқи ишлар вазирлигининг 30 сентябрь кунги баёнотида 400 га яқин ўзбекистонликларнинг биринчи гуруҳи октябрь бошида ватанга қайтарилиши айтилганди. Ўзбекистоннинг Ростов-Дондаги бош консуллиги бош консули Рустам Курганбаев ушбу жараённинг чўзилиб кетганини чартер рейслар билан олиб келинадиганлар рўйхатини тузишга кўп вақт кетиб қолгани, қолаверса, Россия Махсус комиссиясидан Ўзбекистон фуқароларининг Сочи орқали олиб чиқиб кетилишига рухсат олиш кечиккани билан изоҳлаганди. Кейинроқ Курганбаев пандемия туфайли Абхазияда қолиб кетган Ўзбекистон фуқароларини қайтариш 28 октябрдан бошланишини маълум қилган.
Изоҳ (0)