“Paxtakor” “Navbahor”ning uch nafar yetakchisini qo‘lga kiritmoqchi

Toshkentning “Paxtakor” jamoasi “Navbahor”ning uch nafar futbolchisi bilan shartnoma imzolamoqchi, deya xabar qilmoqda “Championat.asia”.

Darvozabon O‘tkir Yusupov, himoyachi Igor Golban va yarim himoyachisi Aziz Turg‘unboyev mavsum yakunida “sherlar” safiga qo‘shilishi mumkin.

Yusupovning namanganliklar bilan amaldagi shartnomasi 2020-yil oxirida o‘z nihoyasiga yetadi. Golban va Turg‘unboyev esa “Navbahor” bilan 2023-yilning dekabriga qadar mo‘ljallangan kelishuvga ega.

Avvalroq Namangan viloyati hokimi vazifasini bajaruvchi Shavkat Abdurazzoqov “Navbahor”ning strategiyasi o‘zgarishi va klub e’tiborini mahalliy yosh futbolchilarga qaratishini ma’lum qilgandi.

Ma’lumot uchun, Turg‘unboyev 2020-yilgi mavsumda 22 ta o‘yinda maydonga tushib, 8 ta gol urdi va bitta golli uzatma amalga oshirdi. Igor Golban 21 ta uchrashuvda ishtirok etib, ikki gol va bitta assistni o‘z hisobiga yozdirib qo‘ydi. Darvozabon O‘tkir Yusupov esa 20 ta o‘yinda harakat qildi va 15 ta gol o‘tkazib yubordi. 9 ta bahsda o‘z darvozasi daxlsizligini saqlab qolgan posbon 1 ta penaltini qaytardi va 2 marta golli uzatma amalga oshirdi.