Profilaktika inspektorlari tomonidan tuzilgan ma’muriy huquqbuzarliklar to‘g‘risidagi bayonnomalar sudlar tomonidan o‘z vaqtida ko‘rib chiqilmayotganligi borasida Oliy sudga shikoyat kelib tushmagan. Bu haqda Oliy sud matbuot xizmati rahbari Azizbek Obidov “Daryo” sayti muxbiri Musulmonbek Ibrohimovga bergan tushuntirishida aytib o‘tdi.
Eslatib o‘tamiz, IIV tashabbusi bilan O‘zbekistonda ma’muriy huquqbuzarliklar to‘g‘risidagi ishlarni ko‘rib chiqish vakolati sudlardan ichki ishlar organlari profilaktika inspektorlariga o‘tkazilishi mumkinligi va bu o‘zgarishni nazarda tutuvchi “Ma’muriy javobgarlik to‘g‘risidagi kodeksga o‘zgartirishlar kiritish to‘g‘risida”gi qonun loyihasi Oliy Majlis Qonunchilik palatasida muhokama qilingan edi. Qonun loyihasini muhokamasida IIV o‘rinbosari Azizbek Ikromov qonunga o‘zgartirishga asos sifatida hududlardagi ma’muriy sudlarning aholi yashash punktlariga uzoqligi hamda ayrim ichki ishlar organlari profilaktika inspektorlari tomonidan tuzilgan ma’muriy huquqbuzarliklar to‘g‘risidagi bayonnomalar o‘z vaqtida sudlar tomonidan ko‘rib chiqilmayotganini keltirib o‘tgan.
Oliy sud matbuot xizmati rahbari Azizbek Obidov IIV vakillari tomonidan keltirilgan vajlarni rad edi:
- Birinchidan, fuqarolik ishlari va iqtisodiy sudlardan farqli o‘laroq, ma’muriy sudlar har bir tumanda tashkil qilingan bo‘lib, bu holat ma’muriy sudlarning aholi yashash punktlariga uzoqligi haqidagi vajni inkor etadi.
- Ikkinchidan, ma’muriy huquqbuzarlik to‘g‘risidagi ishlar ichki ishlar organlarining elektron bazasi orqali sudlarning “E-xsud” elektron bazasiga elektron tarzda kelib tushadi. Shunda ma’muriy material kelib tushgan kundan boshlab, uning yuritilishi, ko‘rish muddatlari, sud majlisi bayonnomasi, sud qarorlarini yozish, ijroga qaratish va shunga o‘xshash barcha protsessual jarayonlar to‘liq nazorat ostida bo‘ladi. Har bir protsessual qonun buzilishlar haqida sudyadan tashqari, sud raisi, viloyat sudining raisi, qolaversa Oliy sud rahbariyati xabardor bo‘lib turadi. Shu sababli tuman ma’muriy sudi sudyalari tomonidan ma’muriy materiallarni ko‘rishda protsessual qonun normalariga to‘liq rioya qilingan holda har bir ish qonunda nazarda tutilgan muddatda ko‘rib chiqiladi.
Deputatlar tomonidan “Ma’muriy javobgarlik to‘g‘risidagi kodeksga o‘zgartirishlar kiritish to‘g‘risida”gi qonun loyihasi birinchi o‘qishdayoq rad etilgan. Deputatlar mazkur o‘zgarish inson huquqlarini ta’minlashda odil sudlovni amalga oshirishga zid kelishi, korrupsiya alomatlarining kelib chiqishiga olib kelishi, huquqni qo‘llashda subyektivlik paydo bo‘lishi, profilaktika inspektorlariga norasmiy rejalar qo‘yilishiga hamda fuqarolarda e’tirozlar paydo bo‘lishiga sabab bo‘lishi mumkinligi kabi vajlarni bildirib o‘tdi.
Avvalroq Ma’muriy javobgarlik to‘g‘risidagi kodeksga o‘zgartirish kiritish to‘g‘risidagi qonun Prezident tomonidan imzolangani va unga ko‘ra endilikda epidemiyalarga qarshi kurashish qoidalarini buzish (54-modda) bilan bog‘liq ma’muriy ishlar ichki ishlar organlari tomonidan ham ko‘rib chiqilishi mumkinligi belgilangan edi.
Izoh (0)