Профилактика инспекторлари томонидан тузилган маъмурий ҳуқуқбузарликлар тўғрисидаги баённомалар судлар томонидан ўз вақтида кўриб чиқилмаётганлиги борасида Олий судга шикоят келиб тушмаган. Бу ҳақда Олий суд матбуот хизмати раҳбари Азизбек Обидов «Дарё» сайти мухбири Мусулмонбек Иброҳимовга берган тушунтиришида айтиб ўтди.
Эслатиб ўтамиз, ИИВ ташаббуси билан Ўзбекистонда маъмурий ҳуқуқбузарликлар тўғрисидаги ишларни кўриб чиқиш ваколати судлардан ички ишлар органлари профилактика инспекторларига ўтказилиши мумкинлиги ва бу ўзгаришни назарда тутувчи «Маъмурий жавобгарлик тўғрисидаги кодексга ўзгартиришлар киритиш тўғрисида»ги қонун лойиҳаси Олий Мажлис Қонунчилик палатасида муҳокама қилинган эди. Қонун лойиҳасини муҳокамасида ИИВ ўринбосари Азизбек Икромов қонунга ўзгартиришга асос сифатида ҳудудлардаги маъмурий судларнинг аҳоли яшаш пунктларига узоқлиги ҳамда айрим ички ишлар органлари профилактика инспекторлари томонидан тузилган маъмурий ҳуқуқбузарликлар тўғрисидаги баённомалар ўз вақтида судлар томонидан кўриб чиқилмаётганини келтириб ўтган.
Олий суд матбуот хизмати раҳбари Азизбек Обидов ИИВ вакиллари томонидан келтирилган важларни рад эди:
- Биринчидан, фуқаролик ишлари ва иқтисодий судлардан фарқли ўлароқ, маъмурий судлар ҳар бир туманда ташкил қилинган бўлиб, бу ҳолат маъмурий судларнинг аҳоли яшаш пунктларига узоқлиги ҳақидаги важни инкор этади.
- Иккинчидан, маъмурий ҳуқуқбузарлик тўғрисидаги ишлар ички ишлар органларининг электрон базаси орқали судларнинг «E-xsud» электрон базасига электрон тарзда келиб тушади. Шунда маъмурий материал келиб тушган кундан бошлаб, унинг юритилиши, кўриш муддатлари, суд мажлиси баённомаси, суд қарорларини ёзиш, ижрога қаратиш ва шунга ўхшаш барча процессуал жараёнлар тўлиқ назорат остида бўлади. Ҳар бир процессуал қонун бузилишлар ҳақида судьядан ташқари, суд раиси, вилоят судининг раиси, қолаверса Олий суд раҳбарияти хабардор бўлиб туради. Шу сабабли туман маъмурий суди судьялари томонидан маъмурий материалларни кўришда процессуал қонун нормаларига тўлиқ риоя қилинган ҳолда ҳар бир иш қонунда назарда тутилган муддатда кўриб чиқилади.
Депутатлар томонидан «Маъмурий жавобгарлик тўғрисидаги кодексга ўзгартиришлар киритиш тўғрисида»ги қонун лойиҳаси биринчи ўқишдаёқ рад этилган. Депутатлар мазкур ўзгариш инсон ҳуқуқларини таъминлашда одил судловни амалга оширишга зид келиши, коррупция аломатларининг келиб чиқишига олиб келиши, ҳуқуқни қўллашда субъективлик пайдо бўлиши, профилактика инспекторларига норасмий режалар қўйилишига ҳамда фуқароларда эътирозлар пайдо бўлишига сабаб бўлиши мумкинлиги каби важларни билдириб ўтди.
Аввалроқ Маъмурий жавобгарлик тўғрисидаги кодексга ўзгартириш киритиш тўғрисидаги қонун Президент томонидан имзолангани ва унга кўра эндиликда эпидемияларга қарши курашиш қоидаларини бузиш (54-модда) билан боғлиқ маъмурий ишлар ички ишлар органлари томонидан ҳам кўриб чиқилиши мумкинлиги белгиланган эди.
Изоҳ (0)